GST Council: ఆరోగ్య, జీవిత బీమాలపై పన్నురేట్ల సమీక్షకు మంత్రుల బృందం ఏర్పాటు
దిశ, బిజినెస్ బ్యూరో: ఆరోగ్య, జీవిత బీమా ప్రీమియంలపై జీఎస్టీ రేటును సూచించేందుకు జీఎస్టీ కౌన్సిల్ కీలక నిర్ణయం తీసుకుంది. పన్ను రేట్లను సమీక్షించేందుకు 13 మంది సభ్యులతో కూడిన మంత్రుల బృందాన్ని(జీఓఎం) ఏర్పాటు చేస్తూ ఆదివారం నిర్ణయించింది. ఈ బృందం అక్టోబర్ 30లోగా నివేదికను సమర్పించనుంది. ఈ బృందానికి బీహార్ ఉప ముఖ్యమంత్రి సామ్రాట్ చౌదరి కన్వీనర్‌గా వ్యవహరిస్తారు. ప్యానెల్ సభ్యులుగా ఉత్తరప్రదేశ్, రాజస్థాన్, పశ్చిమ బెంగాల్, కర్ణాటక, కేరళ, ఆంధ్రప్రదేశ్, గోవా, గుజరాత్, మేఘాలయ, పంజాబ్, తమిళనాడు, తెలంగాణలకు చెందిన మంత్రులు ఉండనున్నారు. ఈ నెల 9న జరిగిన జీఎస్టీ కౌన్సిల్ సమావేశంలో ఈ అంశంపై జీఎస్టీ విధానాన్ని పరిశీలించేందుకు, సమీక్షించేందుకు జీఓఎంను ఏర్పాటు చేయనున్నట్టు ప్రకటించిన సంగతి తెలిసిందే. ఏర్పాటైన జీఓఎం బృందం నివేదిక ఆధారంగా నవంబర్‌లో జరిగే తదుపరి జీఎస్టీ కౌన్సిల్ సమావేశంలో బీమా ప్రీమియంలపై పన్ను గురించి తుది నిర్ణయం తీసుకోనున్నారు.
