Ashok Layland: వాహనాల ధరలను 3 శాతం పెంచిన అశోక్ లేలండ్

దిశ, బిజినెస్ బ్యూరో: హిందూజా గ్రూప్ ఫ్లాగ్‌షిప్ కంపెనీ అశోక్ లేలండ్ తన కమర్షియల్ వాహనాల ధరలను పెంచుతున్నట్టు ప్రకటించింది. ఇటీవలే వాహన పరిశ్రమలో ప్యాసింజర్ కార్ల తయారీ కంపెనీలు ధరలు పెంచాయి. కమర్షియల్ విభాగంలో టాటా మోటార్స్ సైతం పెంపు నిర్ణయం తీసుకున్నాయి. ఈ జాబితాలో అశోక్ లేలండ్ సైతం కొత్త ఏడాది జనవరి నుంచి అన్ని మోడళ్లపై 3 శాతం మేర ధరలను పెంచుతున్నట్టు వెల్లడించింది. ద్రవ్యోల్బణంతో పాటు వాహనాల తయారీలో కీలకమైన వస్తువులు, కమొడిటీ ధరలు పెరగడంతో పాక్షికంగా కొంత భారాన్ని వినియోగదారులకు బదిలీ చేస్తున్నట్టు కంపెనీ తెలిపింది. వాహన మోడల్, వేరియంట్‌ని బట్టి ధరల పెరుగుదలలో మార్పులు ఉంటాయి. ఈ నిర్ణయం ద్వారా ఇన్‌పుట్ కాస్ట్‌లో కొంత భారం తగ్గుతుందని కంపెనీ భావిస్తోంది.