'బ్రహ్మాస్త్ర'ను ఎడిట్ చేయాల్సిందే!
దిశ, వెబ్ డెస్క్ :
బాలీవుడ్ హీరో రణ్ బీర్ కపూర్, ఆలియా భట్ జంటగా తెరకెక్కుతున్న యాక్షన్ ఫాంటసీ సినిమా ‘బ్రహ్మాస్త్ర’. బిగ్ బీ అమితాబ్ బచ్చన్, కింగ్ నాగార్జున ప్రధాన పాత్రల్లో నటిస్తున్న సినిమా మూడు భాగాలుగా పాన్ ఇండియా లెవల్‌లో తెరకెక్కుతోంది. కాగా జనవరిలో సినిమా విడుదలకు సన్నాహాలు చేస్తుండగా.. మూడు గంటల నిడివితో కూడిన సినిమాను చూసిన మూవీ యూనిట్ మరో అర్ధ గంట పాటు సినిమాను కత్తిరిస్తే మంచిదని భావిస్తున్నట్టు తెలుస్తోంది.
ప్రస్తుతం ఆడియన్స్ మైండ్ సెట్ మారిందని.. మరీ మూడు గంటలంటే అంత ఓపిగ్గా సినిమా చూడడం లేదని భావించిన మూవీ యూనిట్.. రెండున్నర గంటల పాటు సినిమా లెంగ్త్ ఉండేలా ఎడిట్ చేయాలని నిర్ణయానికి వచ్చారని టాక్. అయాన్ ముఖర్జీ దర్శకత్వం వహిస్తున్న సినిమా రూ. 150 కోట్ల బడ్జెట్‌తో తెరకెక్కుతుండగా.. ధర్మ ప్రొడక్షన్స్, ఫాక్స్ స్టార్ స్టూడియోస్ బ్యానర్‌పై రణ్ బీర్ కపూర్, అయాన్ ముఖర్జీ, కరణ్ జోహార్, హిరూ జోహార్, అపూర్వ మెహతా, నమిత్ మల్హోత్రా నిర్మిస్తున్నారు.
