కాంగ్రెస్ చెత్తబుట్టలాంటి పార్టీ: మాధవీలత

ప్రధాని నరేంద్ర మోదీని గతితప్పిన ఏనుగుతో పోల్చిన కాంగ్రెస్ సీనియర్ నేత రేణుకా చౌదరిపై బీజేపీ వర్థమాన నేత, సినీ నటి మాధవీలత తీవ్ర స్థాయిలో ఆగ్రహం వ్యక్తం చేశారు. తన సోషల్ మీడియా ద్వారా స్పందించిన ఆమె, ఇంగ్లీష్‌లో వ్యాఖ్యను పెడుతూ..

‘మేడమ్… మాకు ఇంగ్లీష్ రాదు. ఎందుకంటే మేము బ్రిటీష్ దేశాలకు చెందినవారము కాదు. ఇండియాలో పుట్టి, ఇక్కడే పెరిగాము. దేశాన్ని కాంగ్రెస్ పార్టీ 70 ఏళ్లు పరిపాలించింది. అయినప్పటికీ మన దేశంలోని ప్రజలు ఇంకా పేదరికంలోనే ఎందుకు మగ్గుతున్నారు? దీనికి కారణం మీ గత కాంగ్రెస్ ప్రభుత్వాలు కాదా? దేశంలో ఓ చెత్త బుట్టలాంటి పార్టీ మీది. ఈ చెత్తను మోదీ ఊడ్చేస్తారు. దేశాన్ని స్వచ్ఛ భారత్ గా తీర్చిదిద్దుతారు’ అంటూ మండిపడ్డారు.

దీనికి ఏబీఎన్‌ ఛానెల్‌కు రేణుకా చౌదరి ఇచ్చిన ఇంటర్వ్యూ యూట్యూబ్ లింక్‌ను కూడా జత చేశారు. కాగా, కొన్ని సినిమాల్లో నటించి పేరు సంపాదించిన మాధవీలత అవకాశాలు తగ్గడంతో విరామం తీసుకున్నారు. సినీ పరిశ్రమలో కాస్టింగ్ కౌచ్ ఉందంటూ కుండబద్దలు కొట్టడం ద్వారా మాధవీలత మరింత పాప్యులర్ అయ్యారు. అనంతరం రాజకీయాల్లో చేరిన ఆమె తొలుత జనసేనకు అనుకూలంగా మాట్లాడారు. అనంతరం మోదీ సారథ్యంలో మరింత బాగా పని చేస్తానని బీజేపీలోకి మారారు.

Tags: madhavi latha, actress, bollywood, facebook, renuka chowdary, modi