ముట్టుకోకుండా కాస్మోటిక్స్ షాపింగ్!
అమ్మాయిలు, ఆడవాళ్లు మేకప్ సామాను, కాస్మోటిక్స్ కొనడానికి వెళ్లినపుడు.. వారికి నచ్చే వస్తువు కొనడానికి 200 రకాల వస్తువులను వారి ముఖానికి రుద్దుకుని పరీక్షిస్తారు. కానీ కరోనా వైరస్ కారణంగా ఇప్పుడు ఆ అదృష్టం లేదు. ఏదన్నా ముట్టుకుని పరీక్షిద్దామనుకుంటే దాన్ని ఇంతకుముందు ఎవరు ముట్టుకున్నారోననే భయం వెంటాడుతోంది. దీంతో కాస్మోటిక్స్ అమ్మకాలు విపరీతంగా పడిపోయాయి. ఈ సమస్య పరిష్కారమై అమ్మకాలు మళ్లీ పుంజుకోవడానికి దక్షిణ కొరియాకు చెందిన అమొరోపసిఫిక్ కాస్మోటిక్స్ సంస్థ ఒక అద్దాన్ని అందుబాటులో ఉంచింది.
అది మామూలు అద్దం కాదండోయ్.. అగుమెంటెడ్ రియాలిటీతో పనిచేసే అద్దం. అంటే ఇందులో ముఖం చూసుకోగానే ఇది మీ ఫొటో తీస్తుంది. తర్వాత మీ ముఖాన్ని ఆమూలాగ్రం విశ్లేషించి మీ చర్మం తీరు, ముడతలు, డార్క్ సర్కిల్స్ ఉన్నాయా లేదా అని కనిపెడుతుంది. తర్వాత షాపులో ఉన్న ఏ ఉత్పత్తి మీకు సరిపోతుందో.. అది వేసుకుంటే మీరెలా కనిపిస్తారో చూపిస్తుంది. అంతేకాకుండా అక్కడ కనిపించే ఆప్షన్లు ఉపయోగించి మీరు వివిధ ఉత్పత్తులను ఎంచుకుని, అవి వేసుకుంటే మీరెలా కనిపిస్తారో చూసుకోవచ్చు. దీని వల్ల ఉత్పత్తిని ముట్టుకోవాల్సిన పనే ఉండదు.
