వైసీపీలో వర్గపోరు… ఒకరిపై కత్తులతో దాడి

దిశ, ఏపీ బ్యూరో: కర్నూలు జిల్లా వైఎస్ఆర్ కాంగ్రెస్ పార్టీలో వర్గపోరు కత్తులతో దాడి చేసుకునేంత వరకు వెళ్లింది. రెండు వర్గాలుగా విడిపోయిన వైసీపీ నేతలు కత్తులు, ఇనుపరాడ్లతో దాడులకు పాల్పడ్డారు. ఈ ఘటనలో వైసీపీ నేత ఒకరు తీవ్ర గాయాలపాలయ్యారు. వివరాల్లోకి వెళ్తే జిల్లాలోని డోన్ పాతపేటలో వైసీపీ వర్గాలుగా చీలిపోయింది. ఇప్పటికే ఇరు వర్గాల మధ్య వర్గపోరు నడుస్తోంది. ఇటీవలే ఒకరిపై ఒకరు దాడి చేసుకున్న పరిస్థితులు కూడా చోటు చేసుకున్నాయి.

తాజాగా బుధవారం మరోసారి కత్తులు, ఇనుప రాడ్లతో ఇరు వర్గాలు దాడికి పాల్పడ్డాయి. చందు అనే యువకుడిపై ప్రత్యర్థి వర్గం కత్తులతో దాడి చేశారు. దీంతో చందు అక్కడికక్కడే రక్తపు మడుగులో స్పృహ కోల్పోయాడు. చందు పరిస్థితి విషమంగా ఉండటంతో ప్రైవేట్ అంబులెన్స్‌లో కర్నూలు ప్రభుత్వ వైద్యశాలకు తరలించారు. ఈ ఘటనపై కేసు నమోదు చేసిన పోలీసులు విచారణ చేపట్టారు. ఘర్షణకు పాతకక్షలే కారణమని పోలీసులు భావిస్తున్నారు.