లైంగిక వేధింపుల కేసులో క్లీన్ చిట్ అందుకున్న స్టార్ హీరో..
దిశ, వెబ్‌డెస్క్: మీ టూ ప్రచారం సినిమా ఇండస్ట్రీని ఒక ఊపు ఊపిన విషయం తెలిసిందే. దీనిలో భాగంగా చాలా మంది హీరోయిన్స్ తాము ఎదుర్కొన్న లైంగిక వేధింపుల గురించి నోరు విప్పారు. ఈ క్రమంలో ప్రముఖ హీరోలు, నిర్మాతలు, దర్శకులపై ఆరోపణలు వచ్చాయి. ఈ ఆరోపణలు ఎదుర్కొన్న వాళ్లలో స్టార్ హీరో అర్జున్ సర్జా ఒకరు.
నటి శృతి హరిహరన్.. అర్జున్ పై మీటూ ఆరోపణలు చేసింది. ఒక సినిమా షూటింగ్‌లో భాగంగా అర్జున్ తనను రిహార్సల్ సాకుతో కౌగిలించుకున్నాడని ఆరోపించింది. అంతే కాకుండా తన అనుమతి లేకుండా తన చేతులను కిందికి, పైకి లాగాడని చెప్పింది. ఈ ఆరోపణలపై బెంగళూరులోని కబ్బన్ పార్క్ పోలీసులు మూడేళ్ల క్రితం విచారణకు స్వీకరించారు.
తాజాగా కోర్టులో ఈ కేసుపై విచారణ జరగగా.. చట్టపరమైన చర్యలు, విచారణ తర్వాత సాక్ష్యులు ఎవరూ లేకపోవడంతో, అర్జున్ సర్జాపై ఉన్న అన్ని అభియోగాలు వీగిపోయినట్టు పోలీసులు తెలిపారు. ఈ వివాదానికి సంబంధించి ఆయనకు క్లీన్ చిట్ లభించింది.
