Kadapa: 5న ఒంటిమిట్ట కోదండరాముడి కళ్యాణం
దిశ, డైనమిక్ బ్యూరో: ప్రముఖ పుణ్యక్షేత్రం ఒంటిమిట్ట శ్రీ కోదండరామాలయంలో ఏప్రిల్ 5న సీతారాముల కళ్యాణ మహోత్సవం జరగనుంది. శ్రీరామనవమి బ్రహ్మోత్సవాల్లో భాగంగా బుధవారం జరగబోయే కల్యాణానికి జిల్లా యంత్రాంగంతో సమన్వయం చేసుకుని విస్తృతంగా ఏర్పాట్లు చేపట్టినట్లు టీటీడీ ఈవో ఏవీ ధర్మారెడ్డి తెలిపారు. సీతారాముల కళ్యాణ మహోత్సవం సందర్భంగా ఏర్పా్ట్లను కలెక్టర్ విజయరామరాజుతో కలిసి టీటీడీ ఈవో ఏవీ ధర్మారెడ్డి పరిశీలించారు. విభాగాల వారీగా జరుగుతున్న ఏర్పాట్లపై ఈవో సమీక్షించారు.
ఈ సందర్భంగా కల్యాణవేదిక వద్ద ఈవో మీడియాతో మాట్లాడారు. కల్యాణం రోజున సీఎం వైఎస్ జగన్ రాష్ట్ర ప్రభుత్వం తరఫున ముత్యాల తలంబ్రాలు, పట్టువస్త్రాలు సమర్పిస్తారని వెల్లడించారు. కల్యాణవేదిక వద్ద భక్తులు గ్యాలరీల్లోకి ప్రవేశించే ముందే ముత్యంతో కూడిన తలంబ్రాలు, పసుపుకుంకుమ, అన్నప్రసాదం ప్యాకెట్ అందిస్తామని, భక్తులు ఎలాంటి తొందరపాటు లేకుండా వీటిని స్వీకరించి సంతృప్తికరంగా కల్యాణాన్ని దర్శించాలని విజ్ఞప్తి చేశారు. భక్తుల కోసం తగినన్ని మజ్జిగ ప్యాకెట్లు, తాగునీరు అందుబాటులో ఉంచినట్లు తెలిపారు. అంతకు ముందు సీఎం పర్యటనకు సంబంధించి ఆలయ పరిపాలన భవనం వద్ద గల విశ్రాంతి గృహం, ఆలయం, పరిసర ప్రాంతాలు, కల్యాణవేదిక వద్ద చేపట్టిన ఏర్పాట్లను ఈవో ఏవీ ధర్మారెడ్డి క్షుణ్ణంగా పరిశీలించారు. ఈవో ఏవీ ధర్మారెడ్డి వెంట టీటీడీ జఈవో వీరబ్రహ్మం, జాయింట్ కలెక్టర్ సాయికాంత్ వర్మ, అదనపు ఎస్పీ కృష్ణారావు, ఇతర ఉన్నతాధికారులు ఉన్నారు.
