విశాఖ నడిబొడ్డున గంజాయి సాగు కలకలం.. అదుపులో యువకులు

దిశ,వెబ్‌డెస్క్: రాష్ట్రంలో గంజాయి స్మగ్లర్లు రెచ్చిపోతున్నారు. ఏకంగా విశాఖ నడిబొడ్డున గంజాయి సాగు చేయడం కలకలం రేపుతోంది. వివరాల్లోకి వెళితే.. కేజీహెచ్ లేడీస్ హాస్టల్ వెనుక ప్రాంతంలో గుట్టుచప్పుడు కాకుండా గంజాయి పండిస్తున్నారు. ఏడాదిన్నర కాలంగా స్మగ్లర్లు కొండపై గంజాయి పండిస్తున్నట్లు సమాచారం. ఈ క్రమంలో కొంతమంది యువకులు ఏజెన్సీ నుంచి గంజాయిని తీసుకొచ్చి ఇక్కడ పండిస్తున్నట్లు తెలుస్తోంది. ఈ క్రమంలో పోలీసులు గంజాయి సాగు గుర్తు రట్టు చేసి పలువురు యువకులను విశాఖ వన్ టౌన్ పోలీసులు అదుపులోకి తీసుకున్నారు. భారీ స్థాయిలో గంజాయిని సాగు చేస్తున్నారని, దీనికి సంబంధించి కేసు నమోదు చేసి దర్యాప్తు చేస్తున్నట్లు తెలిపారు.