విశాఖ మన్యంలో వైసీపీకి షాక్.. ట్రైకార్ చైర్మన్ బుల్లిబాబు రాజీనామా

దిశ ప్రతినిధి, విశాఖపట్నం: అల్లూరి సీతారామరాజు జిల్లా పాడేరు నియోజకవర్గానికి చెందిన వైఎస్సార్ కాంగ్రెస్ ముఖ్య నేత సతక బుల్లి బాబు పార్టీకి గురువారం రాజీనామా చేశారు. ఈ మేరకు వీడియో సందేశాన్ని మీడియాకు పంపారు. సీటు ఆశించినా దక్కకపోవడంతో ఈ నిర్ణయం తీసుకున్నారు. ట్రైకార్ చైర్మన్‌గా పని చేసిన సతక బుల్లిబాబు పార్టీ ప్రారంభం నుంచి ఉన్న తనకు సీఎం అన్యాయం చేశారంటూ ప్రత్యక్షంగానే అంటున్నారు. దీనిలో భాగంగా ఇప్పటికే రెండు దఫాలుగా తన మద్దతుదారులతో ప్రత్యేకంగా సమావేశం నిర్వహించారు. తాజాగా షర్మిల నాయకత్వంలో కాంగ్రెస్‌లో చేరేందుకు నిర్ణయించినట్టు తెలిసింది. మూడు రోజుల్లో పాడేరు రానున్న షర్మిల సమక్షంలో కాంగ్రెస్‌లో చేరేందుకు ఏర్పాట్లు చేసుకుంటున్నట్టు సమాచారం. ఈ పరిణామాలతో పాడేరు నియోజకవర్గంలో వైసీపీ ఎదురు దెబ్బేనని విశ్లేషకులు అంటున్నారు.