Visakha: ఏయూలో గుప్పమన్న గంజాయి.. సెక్యూరిటీ ముసుగులో సరఫరా!

దిశ, ఉత్తరాంధ్ర: విశాఖపట్నం ఆంధ్ర యూనివర్సిటీలో గంజాయి కలకలం రేపుతుంది. సెక్యూరిటీ సిబ్బంది గంజాయి అమ్మకాలు చేపడుతున్నట్లుగా సమాచారం అందడంతో పోలీసులు రంగంలోకి దిగారు. సెక్యూరిటీ గార్డులను అదుపులోకి తీసుకున్నారు. ఇదే కేసులో మరో నలుగురిని అదుపులోకి తీసుకున్నట్లుగా తెలుస్తోంది. రెండు వాహనాలతో పాటు కేజీ గంజాయి స్వాధీనం చేసినట్లుగా పోలీసులు తెలిపారు. బీచ్ రోడ్ సమీపంలో యోగ విలేజ్ వద్ద అనుమానస్పదంగా ఉన్న ఆటోలో పోలీసులు తనిఖీలు చేశారు. ఓ వ్యక్తిని అదుపులో తీసుకున్నారు. మరో ఇద్దరు పరారయ్యారు.

అయితే పరారైన ఈ ఇద్దరినీ బీచ్ రోడ్డు, ఆంధ్ర యూనివర్సిటీ మధ్యలో కాపు కాచి పట్టుకున్నారు. నిందితులు చంద్రమౌళి, సురేష్, అప్పలరాజు వీరంతా ఆంధ్ర యూనివర్సిటీ సెక్యూరిటీ ఉద్యోగులుగా గుర్తించారు. నిందితుల్లో చంద్రమౌళి ఆంధ్ర యూనివర్సిటీ సెక్యూరిటీ సంబంధించిన కీలకమైన అధికారి వద్ద కార్ డ్రైవర్‌గా పని చేసినట్లుగా పోలీసులు గుర్తించారు. ఏయూ విద్యార్థులకు వీరు గంజాయి విక్రయిస్తున్నారా లేదా అనే దానిపై పోలీసులు ఆరా తీస్తున్నారు. అటు ఏయూలో కూడా తనిఖీలు చేసి మరో వ్యక్తిని అదుపులోకి తీసుకున్నట్టు తెలుస్తోంది. కేసును త్రీ టౌన్ పోలీసులు దర్యాప్తు చేస్తున్నారు.