వరుస సెలవుల ఎఫెక్ట్.. తిరుమలలో పెరిగిన భక్తుల రద్దీ..

దిశ, వెబ్‌డెస్క్: పవిత్ర శ్రావణ మాసం కావడం, వరుసగా సెలవులు రావడంతో తిరుమలలో పెరిగిన భక్తుల రద్దీ భారీగా పెరిగిపోయింది. ఆగస్టు 15, వరలక్ష్మీ వ్రతం, మధ్యలో శనివారం, ఆ తర్వాత వెంటనే ఆదివారం, అలాగే 19న రాఖీ పౌర్ణమి ఉండటంతో భక్తులు తిరుమలకు పోటెత్తారు. దీంతో వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండి శిలాతోరణం వరకు భక్తులు క్యూ లైన్లలో నిల్చున్నారు. దీంతో శ్రీవారి దర్శనం టోకెన్ లేని భక్తులకు సర్వదర్శనానికి 18 గంటల సమయం పడుతుంది. కాగా శుక్రవారం రోజు శ్రీవారిని 62,625 మంది భక్తులు దర్శించుకున్నారు. వీరిలో 34,462 మంది భక్తులు తలనీలాలు సమర్పించుకోగా.. రూ.3.63 కోట్ల హుండీ ఆదాయం వచ్చినట్లు టీటీడీ అధికారులు ప్రకటించారు. అలాగే ఈ రోజు, రేపు కూడా భక్తుల రద్ధీ కొనసాగే అవకాశం ఉందని చెప్పుకొచ్చారు.