TTD Chairman:శ్రీ పద్మావతి అమ్మవారి సేవలో నూతన టీటీడీ చైర్మన్
దిశ, తిరుచానూరు: తిరుచానూరు శ్రీ పద్మావతి అమ్మవారిని టీటీడీ నూతన చైర్మన్ బొల్లినేని రాజగోపాల్ నాయుడు కుటుంబ సమేతంగా మంగళవారం దర్శించుకున్నారు. ఆలయ అధికారులు దర్శన ఏర్పాట్లు చేసి తీర్థ ప్రసాదాలు అందజేశారు. జేఈవో వీర బ్రహ్మం దర్శనం ఏర్పాట్లను పర్యవేక్షించారు. శ్రీ పద్మావతి అమ్మవారి దర్శనార్థం ఆలయానికి విచ్చేసిన టీటీడీ చైర్మన్ బి.ఆర్ నాయుడుకు ఆలయం వద్ద ఘన స్వాగతం లభించింది.
ముందుగా ఆలయం వద్ద చేరుకున్న టిటిడి చైర్మన్‌కు జేఈవో వీరబ్రహ్మం, డిప్యూటీ ఈవో గోవింద రాజన్, ఆలయ అర్చకులు ఆలయ మర్యాదలతో సాంప్రదాయ బద్ధంగా స్వాగతం పలికి దర్శన ఏర్పాట్లు చేశారు. ముందుగా ధ్వజ స్తంభానికి మొక్కులు తీర్చుకున్నానంతరం శ్రీ పద్మావతి అమ్మవారి మూలమూర్తిని దర్శించుకున్నారు. ఆలయ అర్చకులు అమ్మవారి శేష వస్త్రం తో సన్మానించి వేద ఆశీర్వాదం చేయగా అధికారులు అమ్మవారి తీర్థ ప్రసాదాలు అందజేశారు.ఈ కార్యక్రమంలో ఏవిఎస్ఓ సతీష్ కుమార్, సూపరింటెండెంట్లు రమేష్, ప్రసన్న ఆగమ సలహాదారు మణికంఠ స్వామి, ఆలయ సీనియర్ అర్చకులు బాబు స్వామి ఇన్స్పెక్టర్ చలపతి, ప్రసాద్, సుభాస్కర్ తిరుచానూరు సీఐ సునీల్ కుమార్ తదితరులు పాల్గొన్నారు.
