Megastar Chiranjeevi వ్యాఖ్యలపై అధికార పార్టీ నేతలు సీరియస్!
మెగాస్టార్ చిరంజీవి వ్యాఖ్యలు సామాజిక మాధ్యమాల్లో తెగ వైరల్ అవుతున్నాయి. మెగా కుటుంబం వల్ల రాజకీయంగా.. సినిమాలపరంగా ప్రజలకు ఒరింగిందేంటని వైసీపీ కార్యకర్తలు నిలదీస్తున్నారు. రాష్ట్ర ప్రభుత్వాన్ని విమర్శించే స్థాయి వాళ్లకు లేదని ట్రోల్ చేస్తున్నారు. ఇటీవల రాజ్యసభలో సినిమాటొగ్రఫీ అంశంపై వైసీపీ ఎంపీ విజయసాయిరెడ్డి కూడా గళమెత్తారు. వందల కోట్ల బడ్జెట్ తో తీసే సినిమాల్లో కార్మికులకు దక్కుతున్న వాటా చాలా దారుణమన్నారు. హీరోలకు అంత రెమ్యునరేషన్ ఇవ్వాల్సిన అవసరమేంటని నిలదీశారు. వరుస పరిణామాలను దృష్టిలో పెట్టుకొని వాల్తేరు వీరయ్య సినిమా 200 రోజుల విజయోత్సవ సభలో చిరంజీవి స్పందించారు. హీరోల రెమ్యునరేషన్ గురించి ప్రభుత్వానికి ఎందుకు ? ప్రజలు మెచ్చేట్లు పాలన చేయాలని చురకలంటించారు. ఈ వ్యాఖ్యలపై వైసీపీ శ్రేణులు భగ్గుమంటున్నాయి.
దిశ, ఏపీ బ్యూరో: వైసీపీ అధికారంలోకి వచ్చాక సినిమా టిక్కెట్లపై కొన్నాళ్లు వివాదం చెలరేగింది. ఇష్టారీతిన పెంచుకోవడానికి వీల్లేదని ప్రభుత్వం ఆంక్షలు విధించింది. చివరకు సినీ పరిశ్రమ పెద్దలు రంగంలోకి దిగారు. సీఎం జగన్తో చర్చించారు. అనంతరం గొడవ సద్దుమణిగింది. వారాహి యాత్రలో పవన్ కల్యాణ్ తాను ఒక్కో సినిమాకు రూ.200 కోట్లు తీసుకుంటానని చెప్పారు. ఆయన సీఎం జగన్ను టార్గెట్ చేసి మాట్లాడుతున్నా సినీ పరిశ్రమ నుంచి వైసీపీకి ఎలాంటి మద్దతూ లభించలేదు.
పారితోషికం చర్చ అందుకేనా..?
సినీ రంగం మొట్టమొదటి నుంచి టీడీపీకి వెన్నుదన్నుగా ఉంది. ఆ పార్టీకి సినీ ప్రముఖులు ఆర్థిక అండదండలు ఇస్తున్నారని వైసీపీ భావిస్తోంది. సినీ రంగాన్ని తమ వైపు మల్చుకోవడానికి వైసీపీ చేసిన ప్రయత్నాలు ఏవీ అంతగా ఫలించలేదు. అందువల్లే వ్యూహాత్మకంగా హీరోలు, దర్శకులకు అంత రెమ్యునరేషన్ ఎందుకంటూ చర్చ లేవదీసినట్లు విశ్లేషకులు అంచనా వేస్తున్నారు.
టాలీవుడ్ లో విపరీత పోకడలు..
దక్షిణాది సినిమా పరిశ్రమలో ఎక్కడా లేని పోకడలు టాలీవుడ్లోనే కొనసాగుతున్నట్లు సినీ రంగ విశ్లేషకులు భావిస్తున్నారు. కేవలం కొన్ని కుటుంబాల చేతుల్లోనే తెలుగు సినీ చిత్ర సీమ బందీ అయిందంటున్నారు. కేవలం నాలుగైదు కోట్ల బడ్జెట్తో తమిళ, మళయాళ, కన్నడ చిత్రాలు ఆస్కార్ స్థాయిలో ఆదరణ పొందుతున్నాయి. వాళ్ల చిత్రాల్లో సమాజాన్ని పట్టిపీడిస్తున్న అనేక రుగ్మతలపై ఆలోచనలు రేకెత్తిస్తుంటాయి. ఆయా పాత్రల్లో నటనకు మాత్రమే ప్రాధాన్యమిస్తున్నాయి. అనేక భాషల్లో విడుదలవుతున్న ఈ చిత్రాలు ప్రజల నుంచి జేజేలు అందుకుంటున్నాయి. దీనికి భిన్నంగా టాలీవుడ్లో కొద్ది కుటుంబాలకు చెందిన హీరోలను ఎలివేట్ చేయడం కోసమే చిత్రాలు తీస్తున్నట్లు ప్రచారం జరుగుతోంది.
వారి కబంధహస్తాల్లోనే..
వందల కోట్ల వ్యయంతో నిర్మించే తెలుగు చిత్రాల బడ్జెట్లో హీరో, హీరోయిన్, దర్శకులకే సింహభాగం పోతోంది. మిగతా నటులు, నిర్మాణ కార్మికులకు అందే పారితోషికాలు చాలా తక్కువగా ఉంటున్నాయి. కొద్ది రోజులు షూటింగ్లు లేకుంటే సినీ పరిశ్రమ కార్మికులు పస్తులుండాల్సిన దుస్థితి నెలకొంది. కొన్ని కుటుంబాలకు చెందిన వాళ్ల కబంధ హస్తాల్లోనే సినీ థియేటర్లున్నాయి. వాళ్లను కాదని ఎవరైనా సినిమా తీసినా థియేటర్లు ఇవ్వకుండా వేధిస్తారు. కొందరు చిన్న సినిమాల నిర్మాతలు ఈ బాధలు భరించలేకనే తమ చిత్రాలను ఓటీటీ ప్లాట్ఫాంపై విడుదల చేస్తున్నారు. ఈ పరిస్థితి మారాలని ప్రభుత్వం భావిస్తోంది. ఇలాంటి సమయంలో మెగాస్టార్ వ్యాఖ్యలు ప్రభుత్వానికి పుండు మీద కారం చల్లినట్లుంది. ఈ వివాదం ఎక్కడిదాకా దారితీస్తుందోనని సర్వత్రా చర్చజరుగుతోంది.
