ఘోర రోడ్డు ప్రమాదాలు.. తొమ్మిది మంది దుర్మరణం
దిశ, వెబ్‌డెస్క్: చిత్తూరు జిల్లాలో ఘోర రోడ్డు ప్రమాదం చోటుచేసుకుంది. రోడ్డుమీద ఆగివున్న ట్యాంకర్‌ను అతివేగంగా వచ్చిన ఓ అంబులెన్స్ బలంగా ఢీకొట్టింది. ఆ సమయంలో అంబులెన్స్‌లో ఉన్న ఏడుగురిలో నలుగురు అక్కడిక్కడే దుర్మరణం చెందారు. మరో ముగ్గురి పరిస్థితి విషమంగా ఉండటంతో ప్రమాదాన్ని గమనించిన స్థానికులు క్షతగాత్రులను దగ్గర్లోని ఆసుపత్రికి తరలించారు. చిత్తూరు జిల్లాలోని తవనంపల్లి మండలం తెల్లగుండ్లపల్లి వద్ద అంబులెన్స బెంగళూరు నుంచి భువనేశ్శర్ వెళ్తుండగా శుక్రవారం తెల్లవారుజామున ఈ ప్రమదం జరిగింది. విషయం తెలుసుకున్న పోలీసులు హుటాహుటిన ఘటనా స్థలానికి చేరుకొని మృతులు ఉమేశ్ చంద్ర, విజయ్, త్రిలోచన్, మంజులతగా గుర్తించారు.
ఇదిలా ఉండగా.. అన్నమయ్య జిల్లాలో మరో ఘోర రోడ్డు ప్రమాదం జరిగింది. తుఫాన్ వాహనం, లారీ ఎదురెదురుగా ఢీకొని ఐదుగురు అక్కడిక్కడే మృతిచెందారు. మరో ఆరుగురి తీవ్ర గాయాలు కాగా, అందులో నలుగురి పరిస్థితి విషమంగా ఉన్నట్లు సమాచారం. విషయం తెలుసుకొని హుటాహుటిన ఘటనా స్థలానికి చేరుకున్న పోలీసులు మృతులు కర్నాటకలోని బడచి గ్రామస్తులుగా గుర్తించారు. ప్రమాద సమయంలో తుఫాన్ వాహనంలో మొత్తం 16 మంది ప్రయాణికులు ఉన్నట్లు పోలీసులు నిర్ధారించారు. తిరుమల దర్శనానికి వెళ్లి వస్తుండగా కేవీపల్లి మండలం మఠంపల్లి వద్ద శుక్రవారం తెల్లవారుజామున ప్రమాదం జరిగిందని తెలిపారు. ప్రమాదానికి అతివేగమే కారణమని అనుమానిస్తున్నారు.
