మిద్దె కూలి ఒకే కుటుంబంలో నలుగురు చనిపోవడం బాధాకరం: సీఎం చంద్రబాబు

దిశ, వెబ్‌డెస్క్: గత కొద్ది రోజుల క్రితం కురిసిన వర్షాల కారణంగా ఆంధ్రప్రదేశ్ రాష్ట్రంలోని నంద్యాల జిల్లా చాగలమర్రి మండలం చిన్న వంగలి గ్రామంలో మట్టి మిద్దె కూలిపోయింది. ఈ ప్రమాదంలో ఒకే కుటుంబానికి చెందిన నలుగురు మృతి చెందగా.. ఈ ఘటన యావత్ జిల్లాను విషాదంలోకి నెట్టివేసింది. మృతులు గురుశేఖర్‌రెడ్డి (45), దస్తగిరమ్మ (38) దంపతులు ఉండ‌గా, వారి ఇద్దరు కుమార్తెలైన‌ పవిత్ర (16), గురులక్ష్మి(10)లుగా గుర్తించారు. కాగా ఈ ప్రమాదంపై సీఎం చంద్రబాబు నాయుడు స్పందించారు. ఒకే కుటుంబంలో నలుగురు చనిపోవడం బాధాకరం, తల్లిదండ్రులు కోల్పోయిన బాలిక బాధ్యత తీసుకుంటామని ప్రభుత్వం తరఫున బాలికకు రూ.10 లక్షల సహాయం అందిస్తున్నామని సీఎం చంద్రబాబు ప్రకటించారు. అలాగే ఈ ఘటనపై నంద్యాల పార్లమెంట్ సభ్యురాలు డా. బైరెడ్డి శబరి స్పందించారు.. ఈ ఘటన అందరిని కలిచివేసింది.. కుటుంబాన్ని పోగొట్టుకున్న ప్రసన్న చదువు బాధ్యతను తాను తీసుకుంటానని చెప్పారు. అన్ని విధాలుగా అండగా ఉంటానన్నారు. ప్రభుత్వం నుంచి రావాల్సిన పరిహారం అందించేందుకు కృషి చేస్తానని గ్రామస్తులకు ఎంపీ శబరి హామీ ఇచ్చారు.