నువ్వు మంత్రివా.. సినిమా బ్రోకర్‌వా.. మంత్రి అంబటిపై చంద్రబాబు తీవ్ర విమర్శలు

దిశ, వెబ్‌డెస్క్: మంత్రి అంబటి రాంబాబుపై టీడీపీ జాతీయ అధ్యక్షుడు చంద్రబాబు తీవ్ర విమర్శలు చేశారు. బుధవారం పులివెందులలో పర్యటించిన చంద్రబాబు.. ఈ సందర్భంగా మాట్లాడుతూ మంత్రి అంబటిపై నిప్పులు చెరిగారు. ఏపీ ఇరిగేషన్ మంత్రి అంబటి రాంబాబు కాదు.. ఆంబోతు రాంబాబు అని ఘాటు వ్యాఖ్యలు చేశారు. మంత్రి ఆంబోతు రాంబాబుకు అరవడం తప్ప ఏమి రాదని ఎద్దేవా చేశారు. రాష్ట్రంలోని ప్రాజెక్ట్‌ల గురించి మాట్లాడమంటే.. పవన్ కల్యాణ్ బ్రో సినిమా గురించి మాట్లాడుతున్నాడని ఫైర్ అయ్యారు. నువ్వు ఇరిగేషన్ మంత్రివా.. లేక బ్రో సినిమాలో యాక్ట్ చేసిన బ్రోకర్‌వా అని బాబు సంచలన వ్యాఖ్యలు చేశారు.

కాగా, జనసేన చీఫ్, పవర్ స్టార్ పవన్ కల్యాణ్, యంగ్ హీరో సాయిధరమ్ తేజ్ నటించిన బ్రో చిత్రంలో మంత్రి అంబటి రాంబాబును ఇమిటేట్ చేసేలా ఓ డ్యాన్స్ సీన్ పెట్టారని సోషల్ మీడియాలో జోరుగా ప్రచారం జరుగుతోంది. దీనిపై మంత్రి అంబటి రాంబాబు, జనసేన కార్యకర్తలకు మధ్య తీవ్ర వివాదం నడుస్తోంది. బ్రో సినిమా వివాదం ఏపీ రాజకీయాల్లో కాక రేపుతోంది. ఇదిలా ఉండగానే మంత్రి అంబటి రాంబాబుపై చంద్రబాబు చేసిన వ్యాఖ్యలు హాట్ టాపిక్‌గా మారాయి.