Hasina son: నా తల్లి ప్రాణాలను కాపాడినందుకు ఇండియాకు కృతజ్ఞతలు: హసీనా కొడుకు

దిశ, నేషనల్ బ్యూరో: బంగ్లాదేశ్‌ ప్రధాని పదవికి రాజీనామా చేసిన తర్వాత షేక్ హసీనా ఇండియాలో ఆశ్రయం పొందుతున్న విషయం తెలిసిందే. ఈ నేపథ్యంలో ఆమె కుమారుడు సజీబ్ వాజెద్ జాయ్ కష్ట సమయాల్లో తన తల్లికి ఆశ్రయం ఇచ్చి ఆమె ప్రాణాలను కాపాడినందుకు, సురక్షితంగా ఉంచినందుకు ఇండియాకు, మోడీ ప్రభుత్వానికి కృతజ్ఞతలు తెలిపారు. వాషింగ్టన్ నుండి AFP కి ఇచ్చిన ఇంటర్వ్యూలో ఆమె కుమారుడు మాట్లాడుతూ, ప్రస్తుతం బంగ్లాదేశ్‌లో ఉన్న, తాత్కాలిక ప్రభుత్వం పూర్తిగా శక్తిలేనిదని అన్నారు. కొద్ది నెలల్లో ఎన్నికలు జరగాలని కోరుకుంటున్నాను, ఆలస్యం చేస్తే ప్రమాదాలు ఉంటాయని వాజెద్ హెచ్చరించారు. ఎన్నికలు నిర్వహించడం వారి శ్రేయస్సుకు అవసరం. ప్రజల చట్టబద్ధత, నిజమైన అధికారం కలిగిన చట్టబద్ధమైన ప్రభుత్వం తిరిగి రావడానికి అవకాశం లభిస్తుందని ఆయన అన్నారు.

అవామీ లీగ్ సభ్యులు ఆమె పారిపోయినప్పటి నుంచి అజ్ఞాతంలోకి వెళ్లిపోయారు. వారిపై ప్రతీకార దాడులు జరిగాయి, పార్టీ కార్యాలయాలను తగులబెట్టారు. అయితే దాదాపు 170 మిలియన్ల జనాభా ఉన్న దేశ రాజకీయ భవిష్యత్తుకు పార్టీ కీలకమని వాజెద్ అన్నారు. మాకు పది లక్షల మంది అనుచరులు ఉన్నారు. అవామీ లీగ్ లేకుండా బంగ్లాదేశ్‌లో ప్రజాస్వామ్యాన్ని స్థాపించలేరు. దేశంలోని సగం మంది ప్రజలు దీనిని ఎప్పటికీ అంగీకరించరని చెప్పారు. అలాగే, ఈ ఆందోళనల వెనుక విదేశీ శక్తులు ఉన్నాయన్న ఆరోపణలపై ఆయన మాట్లాడుతూ, నేను నమ్ముతున్నాను, ఈ అల్లర్ల వెనుక విదేశీ హస్తం ఉండవచ్చని అన్నారు. నా తల్లి తన దేశం విడిచి వెళ్లాలని ఎప్పుడూ కోరుకోలేదు, అక్కడే పదవీ విరమణ చేయాలనేది ఆమె కల. కానీ పరిస్థితులు ఇలా మారిపోయాయని వాజెద్ పేర్కొన్నారు.