మార్స్‌పైన ఆక్సిజన్ తయారు చేసిన మిషన్ MOXIE
కాబట్టి మార్స్‌లో గాలిని పీల్చడానికి ప్రయత్నిస్తే మ‌నిషికి ఊపిరాడ‌దు. MOXIE is making Oxygen on the red planet Mars.
దిశ. వెబ్‌డెస్క్ః గ్రహాంతర జీవులను క‌నుక్కోవ‌ల‌నే ప్ర‌య‌త్నం రోజురోజుకీ పెరిగిపోతుంది. అలాగే, మాన‌వుడు జీవించ‌గ‌లిగే మ‌రో గ్రహాన్ని కూడా వెతుకుతున్నారు. ముఖ్యంగా భూమికి పొరుగునున్న అంగారక గ్రహంపై ఈ ప్ర‌య‌త్నాలు మ‌రింత‌గా ఊపందుకుంటున్నాయి. మిషన్ మార్స్‌లో భాగంగా ఎన్నో మెషీన్లు మార్స్ కోసం ప‌నిచేస్తున్నాయి. భూమిని దాటి మ‌నిషి బ‌త‌క‌గ‌లిగే మ‌రో గ్ర‌హం కోసం చేసిన అన్వేష‌ణ‌లో శాస్త్ర‌వేత్తలకు ఇష్టమైన మార్స్ దాదాపు భూమికి సమానమైన పరిమాణంలో ఉంటుంది. అంతేకాదు, ఇందులో వాతావరణం కూడా ఉండ‌టం అనుకూలించింది. ఆ వాతావ‌ర‌ణంలోంచి మ‌నిషి బ‌త‌క‌డానికి కావాల్సిన ఆక్సిజన్ త‌యారుచేస్తోంది MOXIE మిషన్. దీనిపై యురేకాఅలెర్ట్‌లో వ్యాసం ప్ర‌చురించారు.
మిలియన్ల సంవత్సరాల క్రితం, దాని ఉపరితలంపై ద్రవ నీరు ఉందని, జీవం కూడా ఉందని ఒక విభాగానికి చెందిన శాస్త్రీయ సమాజం భావిస్తోంది. అంగారక గ్రహంపై ఖచ్చితంగా వాతావరణం ఉందనేది ప్ర‌స్తుతం నిర్వివాదాంశం. అయితే, ఆ వాతావరణం చాలా ప‌ల్చ‌గా ఉంది. ఇది భూమి వాతావరణం కంటే 100 రెట్లు ప‌ల్చ‌న. ఇందులో కార్బన్ డయాక్సైడ్‌ పుష్కలంగా ఉంటుంది. కాబట్టి మార్స్‌లో గాలిని పీల్చడానికి ప్రయత్నిస్తే మ‌నిషికి ఊపిరాడ‌దు. అయితే, ఇప్పుడు ఈ ఎర్ర గ్రహంపైన ఆక్సిజన్ తయారు చేసే మిషన్ చేప‌ట్టారు.
NASA ప‌ర్సివియ‌రెన్స్‌ రోవర్‌కు జోడించిన బ్రీఫ్‌కేస్ పరిమాణంలో ఉన్న యంత్రం ఈ ప‌ని చేప‌ట్టింది. ఈ యంత్రాన్ని MOXIE (మార్స్ ఆక్సిజన్ ఇన్-సిటు రిసోర్స్ యుటిలైజేషన్ (ISRU) ప్రయోగం) అంటారు. MOXIE మార్టిన్‌లో కార్బన్ డయాక్సైడ్‌ని ఉపయోగిస్తుంది. దానిని కార్బన్ మోనాక్సైడ్, ఆక్సిజన్‌గా విభజిస్తుంది. 2021వ సంవత్సరంలో, రోవ‌ర్‌ అంగారకుడి ఉపరితలంపైకి వచ్చిన త‌ర్వాత, MOXIE ఏడుసార్లు ఆక్సిజన్‌ను తయారు చేసింది. "ఈ ప‌రిణామం, మరొక గ్రహ ఉపరితలంపై వనరులను ఉపయోగించి, వాటిని రసాయనికంగా మానవ మిషన్‌కు ఉపయోగపడే విధంగా మార్చడంలో మొదటి ప్రదర్శన" అని MITకు చెందిన మాజీ NASA ఆస్ట్రోనాట్‌, MOXIE డిప్యూటీ ప్రిన్సిపల్ ఇన్వెస్టిగేటర్ జెఫ్రీ హాఫ్‌మాన్ వ్యాఖ్యానించారు.