Israel: ఢిల్లీలో ఇజ్రాయిల్ ఎంబసీ వద్ద భారీ భద్రత

దిశ, వెబ్‌డెస్క్:ఇరాన్, ఇజ్రాయిల్ దేశాల మధ్య కొన్ని రోజులుగా యుద్ధ వాతావరణం నెలకొన్న సంగతి తెలిసిందే.అయితే.. గత నెల 31న, ఇరాన్ రాజధాని టెహ్రాన్‌లో హమాస్ నాయకుడి ఇస్మాయిల్ హనీయే హత్య జరిగింది.ఈ హత్యకు ఇజ్రాయిల్ కారణమని ఇరాన్ ఆరోపిస్తోంది. కాగా.. ఈ హత్య నేపథ్యంలో భారత ఇంటెలిజెన్స్ ఏజెన్సీ ఢిల్లీలోని ఇజ్రాయిల్ ఎంబసీ వద్ద భద్రతను పెంచాలని ఢిల్లీ పోలీసులకు హెచ్చరికలు జారీ చేసింది. దీంతో ఢిల్లీ పోలీసులు అప్రమత్తమై ఆ దేశ ఎంబసీ వద్ద భారీ భద్రతను పెంచారు.

ఇదిలా ఉంటే.. దేశ రాజధాని ఢిల్లీలోని రెండు ఇజ్రాయిల్ భవనాల చుట్టూ భారీ భద్రతా వలయాన్ని ఏర్పాటు చెయ్యడానికి సీనియర్ అధికారులు ఒక సమావేశాన్ని నిర్వహించారు. ఇప్పటికే ఆ రెండు భవనాల చుట్టూ సీసీ కెమెరాలను ఏర్పాటు చేయడంతో పాటు,రెండంచెల భద్రతను ఏర్పాటు చేసినట్లు తెలిపారు.అలాగే అవసరమైతే మరింత ఎక్కువ సిబ్బందిని నియమించుకుంటామని వెల్లడించారు.గత ఏడాది నుండి ఇజ్రాయిల్ ,హమాస్ మధ్య యుద్ధం జరుగుతున్న కారణంగా ఆ దేశ రాయబార కార్యాలయం చుట్టూ ఢిల్లీ పోలీసులు భద్రతను పెంచారు.కాగా.. గత మూడేళ్లలో, దేశ రాజధానిలోని ఇజ్రాయెల్ రాయబార కార్యాలయం సమీపంలో తక్కువ తీవ్రతతో రెండు బాంబ్ పేలుళ్లు జరిగాయి.ఈ రెండు దాడుల్లో ఎవరికీ గాయాలు కాలేదు.