వెనుక బాంబుల వ‌ర్షం.. తాపీగా చిప్స్‌ తింటున్న ఉక్రెయిన్ సోల్జ‌ర్‌! (వీడియో)

దిశ‌, వెబ్‌డెస్క్ః "తిండి కలిగితే కండ కలదోయ్‌.. కండ కలవాడేను మనిషోయ్.. ఈసురోమని మనుషులుంటే.. దేశమే గతి బాగుపడునోయ్‌.." అని చెప్పిన‌ గుర‌జాడ మాట‌లు ఇక్క‌డ ప్ర‌స్తావించక త‌ప్ప‌దు. స‌రిగ్గా, ఈ మాట‌ల్ని పాటిస్తున్న వ్య‌క్తిలా క‌నిపిస్తాడు ఈ ఉక్రెయిన్ సైనికుడు. ర‌ష్యా, ఉక్రెయిన్‌ల మ‌ధ్య యుద్ధం ఎంత తీవ్ర‌స్థాయిలో జ‌రుగుతోందో అంద‌రికీ తెలుసు. న‌గ‌రాల‌కు న‌గ‌రాలు బాంబుల వ‌ర్షంతో కాలి బూడిద‌వుతున్నాయి. ఇలాంటి భ‌యాన‌క ప్ర‌దేశంలో ఓ సైనికుడు తన వెనుక వ‌రుస బెట్టి క్షిపణులు పేలుతుంటే, ఓ ప్యాకెట్‌లో చిప్స్ తింటున్న దృశ్యాలు సోషల్ మీడియాలో వైరల్ అవుతున్నాయి. క్షిపణులను ప్రయోగిస్తున్న‌ వాహనం నుండి చాలా సాధార‌ణంగా, అక్క‌డేమీ జ‌ర‌గ‌ట్లేద‌న్న‌ట్లు నడుచుకుంటూ వెళుతున్న దృశ్యాలు ఇంట‌ర్నెట్‌లో జ‌నాల‌ను ఆశ్చ‌ర్యానికి గురిచేస్తున్నాయి. ఈ క్లిప్‌ను కీవ్ ఇండిపెండెంట్ కోసం డిఫెన్స్ రిపోర్టర్ ఇలియా పొనోమరెంకో ట్విట్టర్‌లో షేర్ చేశారు. ఈ వీడియోపై విభిన్న కామెంట్లు వ‌చ్చిన‌ప్ప‌టికీ, దేశ ర‌క్ష‌ణ కోసం పాటుప‌డే వారికి తిండే లేక‌పోతే, ఆ దేశ‌ ప్ర‌జ‌లు ప‌రాయి పాల‌న‌లో మ‌ళ్లీ బానిస‌లవుతారని కొంద‌రు నెటిజ‌నులు కామెంట్ చేస్తున్నారు.