మాటల్లో దింపి.. మత్తు మందు చల్లి.. ‘లేడీ’ కిలాడీ ఏం చేసిందంటే.?

దిశ ప్రతినిధి, మహబూబ్ నగర్ : ఓ వృద్ధురాలిపై మత్తు మందు స్ప్రే చేసి బంగారు గొలుసును ఓ మహిళా దొంగ ఎత్తుకెళ్లిన ఘటన బుధవారం జోగులాంబ గద్వాల జిల్లా అలంపూర్‌లో చోటుచేసుకుంది. వివరాల ప్రకారం.. రత్నమ్మ అనే వృద్ధురాలు తన ఇంట్లో ఒంటరిగా ఉండగా గుర్తు తెలియని మహిళ వచ్చి మీ ఇల్లు కూలిపోయే దశలో ఉంది.

కొత్త ఇల్లు కోసం మీకు ప్రభుత్వం నాలుగు లక్షల రూపాయలు మంజూరు చేసిందని, అందుకు మీ ఆధార్ కార్డు, బ్యాంకు పాస్ బుక్ వివరాలు కావాలని వృద్ధురాలిని సదరు మహిళ అడిగింది. ఈ క్రమంలో నాకు ఏమీ తెలియదు బిడ్డ.. ఈ విషయాలన్నీ నా కొడుక్కు తెలుసు.. వచ్చినాక అడిగి తీసుకో అని సమాధానం ఇచ్చింది.

ఎన్ని విధాలుగా నచ్చజెప్పే ప్రయత్నం చేసినా వృద్ధురాలు వినకపోవడంతో తన వెంట తెచ్చుకున్న మత్తు మందును వృద్ధురాలి ముఖంపై స్ప్రే చేసింది మహిళా దొంగ. దీంతో ఆ వృద్ధురాలు ఇబ్బంది పడుతూ ఉండగా ఆమె మెడలో ఉన్న మూడున్నర తులాల బంగారు గొలుసును దొంగలించి సదరు దొంగ పరారీ అయింది.

కొంతసేపటి తర్వాత రత్నమ్మ తేరుకొని తన మెడలో చూసుకోగా గొలుసు మాయమైనట్లు గుర్తించి తమ సమీపంలో ఉన్న వారి దగ్గరకు వెళ్లి విషయాన్ని తెలిపింది. ఈ మేరకు పోలీసులకు ఫిర్యాదు చేయడంతో వారి వివరాలను సేకరిస్తున్నారు. సీసీ ఫుటేజీని పోలీసులు పరిశీలిస్తున్నారు. ఈ మేరకు అలంపూర్ ఎస్ఐ మధుసూదన్ రెడ్డి కేసు నమోదు చేసుకుని దర్యాప్తు చేస్తున్నట్టు తెలిపారు.