చెలరేగిన హెట్‌మెయిర్‌.. రెండో టీ20 కూడా విండీస్‌దే

దిశ, స్పోర్ట్స్: వెస్టిండీస్ జట్టు సొంత గడ్డపై ఆల్‌రౌండ్ షోతో చెలరేగిపోయింది. ఆస్ట్రేలియాతో జరిగిన రెండో టీ20 లో 56 పరుగులతో ఘన విజయం సాధించి ఐదు మ్యాచ్‌ల సిరీస్‌లో 2-0తో ఆధిక్యంలోకి దూసుకెళ్లింది. టాస్ ఓడి బ్యాటింగ్ చేసిన వెస్టిండీస్ నిర్ణీత 20 ఓవర్లలో 4 వికెట్ల నష్టానికి 196 పరుగులు చేసింది. షిమ్రోన్ హెట్‌మెయర్ కేవలం 36 బంతుల్లో 61 పరుగులతో చెలరేగిపోయాడు. అతడి ఇన్నింగ్స్‌లో 2 ఫోర్లు 4 సిక్సులు ఉన్నాయి. అతడికి తోడు డ్వేన్ బ్రావో 47, లెండి సిమ్మన్స్ 30, ఆండ్రీ రస్సెల్ 24 పరుగులతో రాణించారు. 197 పరుగుల భారీ లక్ష్యంతో బరిలోకి దిగిన ఆస్ట్రేలియా జట్టు ఏ మాత్రం పోటీ ఇవ్వలేకపోయింది. కేవలం 19.2 ఓవర్లలో 140 పరుగులకే ఆలౌట్ అయ్యింది. మిచెల్ మార్ష్ 54 పరుగులు చేయగా.. జోష్ ఫిలిప్, హెన్రిక్స్ మాత్రమే రెండంకెల పరుగులను దాటారు. వీరిద్దరూ చెరో 19 పరుగులు చేశారు. ఇక మిగతా బ్యాట్స్‌మెన్ ఎవరూ రాణించలేదు. ఈ విజయంతో వెస్టిండీస్ టీ20 సిరీస్‌లో 2-0 ఆధిక్యంలోకి వెళ్లింది.మూడో టీ20 మ్యాచ్ మంగళవారం జరుగనున్నది.