ఏపీలో నేడు, రేపు వర్షాలు.. ఎక్కడెక్కడంటే ?

దిశ, ఏపీ బ్యూరో: ఉత్తరాంధ్ర–దక్షిణ ఒడిశా తీరాలకు సమీపంలో వాయువ్య బంగాళాఖాతంలో ఏర్పడిన అల్ప పీడనం స్థిరంగా కొనసాగుతోంది. అల్పపీడనం మీదుగా ఏర్పడిన రుతుపవన ద్రోణి ఆగ్నేయ దిశగా తూర్పు మధ్య బంగాళాఖాతం వరకూ కొనసాగుతోంది. అల్పపీడన ప్రభావంతో సోమ, మంగళవారాలలో వర్షాలు కురిసే అవకాశం ఉందని అమరావతి వాతావరణ కేంద్రం స్పష్టం చేసింది. సోమ,మంగళవారాల్లో కోస్తా, రాయలసీమల్లో అక్కడక్కడా తేలికపాటి వర్షాలు కురుస్తాయని స్పష్టం చేసింది. పలు ప్రాంతాల్లో తేలికపాటి నుంచి మోస్తరు వర్షాలు, ఒకట్రెండు చోట్ల భారీ వర్షాలు కురుస్తాయని తెలిపింది. ఉత్తర, కోస్తాంధ్ర, దక్షిణ ఒడిశా తీరంలో అల్పపీడనం కేంద్రీకృతమైనట్లు వాతావరణ కేంద్రం వివరించింది.