నిన్ను త్వరలోనే చంపేస్తాం.. నటికి అపరిచితుల బెదిరింపు లేఖ

దిశ, సినిమా : బాలీవుడ్‌ నటి స్వరా భాస్కర్‌.. అపరిచితుల నుంచి తనకు ప్రాణహాని ఉందంటూ ఆవేదన వ్యక్తం చేసింది. తాజాగా తన ఇంటికి ఫ్రమ్ అడ్రస్ లేకుండా ఓ లెటర్ వచ్చిందని, అందులో 'నిన్ను చంపేస్తాం' అంటూ భయాందోళనకు గురిచేసే వ్యాఖ్యలు రాసి ఉన్నట్లు తెలిపింది.

విషయానికొస్తే.. తనను జైలు నుంచి విడిపించాలంటూ బ్రిటిష్‌ ప్రభుత్వాన్ని వీర్ సావర్కర్‌ వేడుకున్నాడని, అది వీరత్వం ఎలా అవుతుందని ఆమె 2017లో షాకింగ్ కామెంట్స్ చేసిన సంగతి తెలిసిందే. కాగా ఇదే గొడవ మరోసారి తెరపైకి వచ్చినట్లు తెలుస్తోంది. ఇదిలా ఉంటే.. 'మహారాష్ట్ర, వెర్సోవాలోని నా నివాసానికి రెండు రోజుల క్రితం స్పీడ్‌ పోస్ట్‌ వచ్చింది. వీర్‌ సావర్కర్‌ను అవమానిస్తే సహించబోమని, తొందరలోనే నీ ప్రాణం కూడా తీస్తామంటూ హిందీలో కొన్ని వ్యాఖ్యలు ఉన్నాయి. దీంతో పోలీసులను ఆశ్రయించాను' అంటూ వివరించింది. ఇక ఈ ఇష్యూపై కేసు నమోదు చేసిన పోలీసులు దర్యాప్తు చేపట్టినట్లు తెలిపారు.