నిన్న టీఆర్ఎస్‌కు రాజీనామా.. నేడు కాంగ్రెస్‌లో చేరిక

దిశ, జగిత్యాల : జగిత్యాల జిల్లా కొడిమ్యాల మండలంలో టీఆర్ఎస్ పార్టీకి గట్టి షాక్ తగిలింది. శనివారం ఆ పార్టీకి రాజీనామా చేసిన పీఏసీఎస్ వైస్ చైర్‌పర్సన్ గడ్డం కవిత 24 గంటలు గడవకముందే కాంగ్రెస్ పార్టీలో చేరారు. ఆదివారం జగిత్యాల జిల్లా కేంద్రంలోని ఇందిరాభవన్‌లో ఎమ్మెల్సీ జీవన్ రెడ్డి సమక్షంలో కాంగ్రెస్ తీర్థం పుచ్చుకున్నారు. కవితతో పాటు గడ్డం చంద్రమోహన్ రెడ్డి, దోమకొండ నర్సయ్య పార్టీలో చేరారు. ఈ సందర్భంగా కవిత మాట్లాడుతూ కష్టపడి పనిచేసినప్పటికీ సరైన గుర్తింపు లేదన్నారు. మండలంలో కేవలం ఒక వర్గం మాత్రమే ఆధిపత్యం చలాయిస్తుందని, కనీసం పార్టీ సమావేశాలకు కూడా దూరం పెడుతున్నారని, అందువల్లనే పార్టీ వీడినట్లు వెల్లడించారు. ఈ కార్యక్రమంలో టీపీసీసీ ఆర్గనైనింగ్ సెక్రెటరీ గొగూరి మహిపాల్ రెడ్డి, మండల అధ్యక్షుడు చిలువేరి నారాయణ, మాజీ డీసీసీబీ డైరెక్టర్ గుడి మల్లిఖార్జున్ రెడ్డి, మాజీ సర్పంచ్ పిడుగు ప్రభాకర్ రెడ్డి, పీఏసీఎస్ డైరెక్టర్ నాగభూషన్ రెడ్డి, గుడి వీరారెడ్డి, మాజీ ఎంపీపీ లు డబ్బు లక్ష్మారెడ్డి, బండ భాస్కర్ రెడ్డి తదితరులు పాల్గొన్నారు.