బైక్ ను ఢీ కొట్టిన కారు.. వ్యక్తికి తీవ్ర గాయాలు..

దిశ, ఖానాపురం : రోడ్డు ప్రమాదంలో వ్యక్తి తీవ్రంగా గాయపడిన సంఘటన వరంగల్ జిల్లా ఖానాపురం మండలం కేంద్రంలో బుధవారం చోటుచేసుకుంది. మండల కేంద్రానికి చెందిన పర్ష సతీష్ ఖానాపురం గ్రామంలో తన కూతురు పెళ్లి పత్రికలు పంచుటకు బైక్ పై వెళుతున్నాడు. ఈ క్రమంలో మసీదు వద్ద యూటర్న్ తీసుకుని వెళ్తుండగా నర్సంపేట నుండి మహబూబాబాద్ వైపు అతివేగంతో వెళ్తున్న కారు దూసుకొచ్చి బైక్ ను బలంగా ఢీ కొట్టడంతో అతనికి తీవ్ర గాయాలయ్యాయి.

ప్రమాదంలో ఎగిరిపడి రోడ్డుకు బలంగా తాకడంతో తలకు గాయమై అపస్మారక స్థితిలోకి వెళ్ళడంతో స్థానికులు హుటాహుటిన హాస్పిటల్ కు తరలించారు. కూతురు వివాహ సమయంలో ప్రమాదం జరగడంతో గ్రామస్థులు, కుటుంబ సభ్యులు విచారం వ్యక్తం చేస్తున్నారు. సంఘటనా స్థలానికి పోలీసులు చేరుకొని విచారణ చేస్తున్నారు. ప్రమాదానికి కారణమైన కారును పోలీస్ స్టేషన్ కు తరలించారు.