యూజీ ‘నీట్’-2024 ఆయూష్ కటాఫ్‌ స్కోర్ తగ్గింపు.. ఉత్తర్వులు జారీ

దిశ, తెలంగాణ బ్యూరో: ఆయూష్ యూజీ, పీజీ సీట్ల ఖాళీల భర్తీకి కేంద్ర ఆయుష్ మంత్రిత్వ శాఖ తాజాగా కీలక నిర్ణయం తీసుకుంది. ఏఐఏపీజీఈటీ (ఆలిండియా ఆయుష్ పోస్ట్ గ్రాడ్యుయేట్ ఎంట్రన్స్ టెస్టు)-2024, యూజీ ‘నీట్’-2024 ఆయూష్ కటాఫ్‌ స్కోర్‌‌ను 15 శాతానికి తగ్గిస్తూ ఉత్తర్వులు జారీ చేసింది. ఆ మేరకు ఆయూష్ యూజీ, పీజీ క్వాలిఫయింగ్‌ కటాఫ్‌ జనరల్‌ కేటగిరీ 35వ పర్సెంటైల్‌, దివ్యాంగులు (జనరల్‌)కు 30, ఎస్సీ, ఎస్టీ, ఓబీసీ రిజర్వుడ్‌ కేటగిరీలకు 25 పర్సెంటైల్‌గా నిర్ణయించారు. కటాఫ్‌ మార్కులు తగ్గడంతో ఈ మేరకు అర్హత సాధించిన అభ్యర్థులు పీజీ ఆయుర్వేదం, హోమియో, యునానీ కోర్సుల్లో కన్వీనర్‌, ఆల్ ఇండియా కోటాలకు, అదేవిధంగా బీహెచ్‌ఎంఎస్, బీఏఎంఎస్, బీఎన్‌వైఎస్, బీయూఎంఎస్ కన్వీనర్‌ కోటా, బీహెచ్‌ఎంఎస్ యాజమాన్య కోటాలలో దరఖాస్తు చేసుకోవడానికి వెసులుబాటు కల్పిస్తూ కాళోజీ ఆరోగ్య విశ్వవిద్యాలయం మరోసారి ప్రవేశ ప్రకటనలను జారీ చేసింది.

ఆసక్తి ఉన్న అభ్యర్థులు కన్వీనర్, యాజమాన్య కోటాలకు విడివిడిగా దరఖాస్తు చేసుకోవాలసి ఉంటుంది. తగ్గిన కటాఫ్ స్కోర్ ఆధారంగా అర్హత సాధించిన అభ్యర్థులు పీజీ ఆయూష్ సీట్ల కొరకు ఈనెల 16 నుంచి 19 వరకు, యూజీ ఆయూష్ సీట్లకు ఈనెల 15 నుంచి 19 వరకు దరఖాస్తు చేసుకోవచ్చు. అభ్యర్థులు ఆన్‌లైన్‌లో దరఖాస్తుతో పాటు సంబంధిత ధృవీకరణ పత్రాలను అప్‌లోడ్‌ చేయాల్సి ఉంటుంది. దరఖాస్తుల పరిశీలన అనంతరం తుది మెరిట్‌ జాబితాను విదుదల చేస్తారు. మరిన్ని వివరాలకు www.knruhs.telangana.gov.in వెబ్‌సైట్‌ను చూడాలని యూనివర్సిటీ వర్గాలు ఓ ప్రకటనలో తెలిపాయి.