కాంగ్రెస్‌కు గుడ్‌బై.. ఇవాళ బీజేపీలో చేరనున్న ఇద్దరు సీనియర్ నేతలు!
మాజీ మంత్రి, సనత్‌నగర్ మాజీ ఎమ్మెల్యే మర్రి శశిధర్ రెడ్డి కాంగ్రెస్ పార్టీకి రాజీనామా చేసిన విషయం తెలిసిందే. ముందుగా పార్టీ క్రమశిక్షణను ఉల్లంఘించారంటూ ఇటీవల ఆయనను పార్టీ నుంచి ఆరేళ్ల పాటు సస్పెండ్ చేసింది. ఆ తర్వాత ఆయన పార్టీ ప్రాథమిక సభ్యత్వానికి రాజీనామా చేశారు.
దిశ, వెబ్‌డెస్క్: మాజీ మంత్రి, సనత్‌నగర్ మాజీ ఎమ్మెల్యే మర్రి శశిధర్ రెడ్డి కాంగ్రెస్ పార్టీకి రాజీనామా చేసిన విషయం తెలిసిందే. ముందుగా పార్టీ క్రమశిక్షణను ఉల్లంఘించారంటూ ఇటీవల ఆయనను పార్టీ నుంచి ఆరేళ్ల పాటు సస్పెండ్ చేసింది. ఆ తర్వాత ఆయన పార్టీ ప్రాథమిక సభ్యత్వానికి రాజీనామా చేశారు. అనంతరం తాను బీజేపీలో చేరుతున్నట్లు ప్రకటించిన సంగతి తెలిసిందే. అయితే, ఆయన ఇవాళే కమలం గూటికి చేరనున్నారు. ఢిల్లీలో బీజేపీ జాతీయ అధ్యక్షుడు జేపీ నడ్డా సమక్షంలో కాషాయ తీర్థం పుచ్చుకోనున్నారు. బీజేపీలో చేరిక సందర్భంగా గురువారం మర్రి శశిధర్ రెడ్డి ఢిల్లీ వెళ్లారు. ఆయనతో పాటు రాష్ట్ర బీజేపీ అధ్యక్షుడు బండి సంజయ్, బీజేపీ రాష్ట్ర చేరికల కమిటీ ఛైర్మన్ ఈటల రాజేందర్, సీనియర్ నాయకురాలు డీకే అరుణ, మాజీ ఎంపీ వివేక్ వెంకటస్వామి, ఇతర రాష్ట్ర ముఖ్య నేతలు ఢిల్లీకి చేరుకున్నారు. ఈరోజు జరగనున్న మర్రి శశిధర్ రెడ్డి బీజేపీలో చేరిక కార్యక్రమంలో రాష్ట్ర బీజేపీ నేతలు పాల్గొననున్నారు. అంతేగాక, మర్రి శశిధర్ రెడ్డితో పాటు నిర్మల్ జిల్లా మాజీ కాంగ్రెస్ పార్టీ అధ్యక్షుడు పవార్ రామారావు పటేల్ కూడా జేపీ నడ్డా సమక్షంలో కాషాయ కండువా కప్పుకోనున్నారు. ఆదిలాబాద్ బీజేపీ ఎంపీ సోయం బాపురావుతో కలిసి గురువారం రాత్రే ఢిల్లీకి రామారావు పటేల్ బయలుదేరారు.