దిశ, బడంగ్ పేట్ : బడంగ్ పేట్ మున్సిపల్ కార్పొరేషన్ పరిధిలోని అల్మాస్ గూడలో రెడీ మిక్స్ లారీ భీభత్సం సృష్టించింది. ఆ సమయంలో అక్కడ ఎవ్వరూ లేకపోవడంతో పెను ప్రమాదం తప్పింది. వివరాలలోకి వెళితే... బడంగ్ పేట్ మున్సిపల్ కార్పొరేషన్ పరిధిలోని అల్మాస్ గూడ లోని ఆర్ వీఆర్ కాలనీ రోడ్డు నెంబర్ 7లో శనివారం సాయంత్రం ఓ రెడీ మిక్స్ లారీ వెళ్తుండగా విద్యుత్ వైర్లు తగిలాయి. అది చూడకుండా లారీ డ్రైవర్ వేగం పెంచడంతో విద్యుత్ వైర్లు భిగించిన స్తంభమే విరిగి రెడీ మిక్స్ లారీ పై పడింది. ఆసమయంలో వర్షం పడుతుండడంతో స్థానికులు ఎవరూ బయటికి రాకపోవడంతో పెను ప్రమాదం తప్పింది. లారీ డ్రైవర్ కూడా ప్రాణాలతో సురక్షితంగా బయటపడ్డాడు. ప్రమాదం జరిగిన వెంటనే విద్యుత్ సరఫరాలో అంతరాయం కలిగింది. ఆ శబ్దం విన్న స్థానికులు వెంటనే బయటికి వచ్చి చూడడంతో తీవ్ర భయాందోళనకు గురయ్యారు. ఆ ఘటనా స్థలంలో విద్యుత్ వైర్లు కిందికి వేలాడుతు ప్రమాదభరితంగా మారాయి. ఎప్పుడు ఏం ప్రమాదం ముంచుకొస్తుందోనని తీవ్ర భయాందోళనకు గురౌతున్నారు. ఎవ్వరినీ అటువైపు రాకుండా స్థానికులు తగిన జాగ్రత్తలు తీసుకుంటున్నారు. వెంటనే సంబంధిత విద్యత్ శాఖ అధికారులు వెంటనే స్పందించి విరిగిన విద్యుత్ స్తంభం చోట కొత్త స్తంభాన్ని ఏర్పాటు చేసి కరెంట్ సరఫరాను పునరుద్దరించాలని కోరుతున్నారు.