ప్రమాదవశాత్తు నీటిలో పడి వ్యక్తి మృతి

దిశ, మునుగోడు; నల్లగొండ జిల్లా మునుగోడు మండల పరిధిలోని చొల్లేడు గ్రామంలో ప్రమాదవశాత్తు నీటి గుంతలో పడి వ్యక్తి మృతి చెందిన సంఘటన ఆదివారం చోటు చేసుకుంది. గ్రామస్తులు, పోలీసులు తెలిపిన వివరాల ప్రకారం..దోటి సత్తయ్య(30) అనే వ్యక్తి చిన్నప్పటి నుండే మతిస్థిమిత్తం కోల్పోయి గ్రామంలో తిరుగుతూ రెండు, మూడు రోజులకు ఒకసారి ఇంటికి వచ్చేవాడు. అదే మాదిరిగా రెండు రోజుల క్రితం ఇంటి నుంచి వెళ్ళిపోయి తిరిగి రాలేదు. ఆదివారం ఉదయం గ్రామ శివారులోని పెద్దమ్మ గుడి సమీపంలోని వాగులో మనిషి కదలికలు లేకుండా తేలి ఉండడం గమనించిన వంగూరి శంకరయ్య అనే రైతు గ్రామస్తులకు తెలిపారు. స్థానికుల సాయంతో బయటకు తీయగా.. అదే గ్రామానికి చెందిన దోటి సత్తయ్య అనే వ్యక్తిగా గుర్తించారు. అప్పటికే వ్యక్తి మృతి చెందాడు. వెంటనే మృతుడిని అన్న నర్సింహ్మ కు సమాచారం ఇచ్చారు. గ్రామస్తుల సమాచారంతో సంఘటన స్థలానికి చేరుకున్న పోలిసులు కేసు దర్యాప్తు చేస్తున్నట్లు స్థానిక ఎస్ఐ రవి తెలిపారు.