దుబ్బాక నియోజకవర్గం కు నీళ్లు ఇచ్చిన తర్వాతే హైదరాబాద్ కు తీసుకెళ్లాలి..

దిశ, దౌల్తాబాద్ : మల్లన్న సాగర్ లో పుష్కలంగా నీళ్లున్నా, రైతులకు నీళ్లు అందించడంలో కాంగ్రెస్ ప్రభుత్వం వైఫల్యం చెందిందని దుబ్బాక ఎమ్మెల్యే కొత్త ప్రభాకర్ రెడ్డి విమర్శించారు. రాయపోల్ మండలంలోని తిమ్మక్క పల్లి లో ఆయన విలేఖరులతో మాట్లాడారు..కేసీఆర్ హయాంలోనే కాళేశ్వరం ప్రాజెక్టు నుంచి మొదలుకొని మల్లన్న సాగర్, కొండపోచమ్మ సాగర్ ప్రాజెక్టుల వరకు పూర్తి చేసుకోవడం జరిగిందన్నారు. దుబ్బాక నియోజకవర్గంలోని మల్లన్న సాగర్ జల బాండాగారంగా ఉందన్నారు. ఎమ్మెల్యే గా గెలువగానే ఏడాది క్రితం నుండి మల్లన్న సాగర్, కొండపోచమ్మ సాగర్ ల నుండి ప్రతి ఎకరాకు సాగునీరు అందించేలా పిల్ల కాలువలు పూర్తి చేయాలని ప్రభుత్వం ను కోరడం జరిగిందన్నారు. ఎన్ని సార్లు విజ్ఞప్తి చేసినా ప్రభుత్వం పట్టించుకోలేదన్నారు. దుబ్బాక నియోజకవర్గం లో కాలువల నిర్మాణం పక్కన పెట్టి హైదరాబాద్ కు నీళ్లు తీసుకోవడానికి పనులు చేపడుతున్నారని, వీరికి రైతుల మీద ఏ పాటి ప్రేమ ఉందొ అర్థమవుతుందన్నారు. ఈ ఏడు వర్షాభావ పరిస్థితి ఏర్పడటంతో యాసంగి సాగు ప్రశ్నర్ధకంగా మారిందన్నారు.

యాసంగి కి కాలువలు నిర్మించి సాగునీళ్లు విడుదల చేయకపోతే పంట పొలాలు ఎండి పోవడం ఖాయమన్నారు. ఒక్క గుంట పొలం ఎండినా అది ప్రభుత్వ వైపుల్యం అవుతుందని, ప్రభుత్వం బాధ్యత వహించాలన్నారు. దుబ్బాక నియోజకవర్గం లో గతంలో నిర్మించిన కాలువలు పిచ్చి గడ్డి, మొక్కలతో, పూడికతో నిండిపోయిందని, ప్రభుత్వం పట్టించుకోవడం లేదన్నారు. దుబ్బాక నియోజకవర్గం లో కాలువలు పూర్తి చేసి చెరువు, కుంటలకు, పంట పొలాలకు సాగునీరు విడుదల చేయలేని పక్షంలో హైదరాబాద్ కు మల్లన్న సాగర్ నుంచి తరలించే నీటిని వేలాది మంది రైతులతో కలిసి అడ్డుకుంటామని హెచ్చరించారు.

ఇప్పటికే రుణమాఫీ 50% మాత్రమే అయిందని, 100% మాఫీ చేయాలని ఆయన కోరారు. రైతు భరోసా సైతం వానాకాలం, యాసంగి రెండు పంటలయి విడుదల చేయాలని డిమాండ్ చేశారు. రాజకీయాలు పక్కన పెట్టి, రైతుల హితమే లక్ష్యంగా పనిచేయాలని కోరారు. ఈ కార్యక్రమంలో రాష్ట్ర ఎస్సీ, ఎస్టీ చైర్మన్ బక్కి వెంకటయ్య, రాష్ట్ర నాయకులు భూంపల్లి మనోహర రావు, రాయపోల్, తొగుట మండలాల పార్టీ అధ్యక్షులు వెంకటేశ్వర శర్మ, జీడిపల్లి రాంరెడ్డి, మాజీ జడ్పీటీసీ లింగాయపల్లి యాదగిరి, నాయకులు హన్మాండ్ల కాడి రాజిరెడ్డి, కల్లూరి శ్రీనివాస్.కర్ణంపల్లి రాజిరెడ్డి, ఇప్ప దయాకర్, మండల యూత్ నాయకులుదయాకర్ రెడ్డి.రామచంద్రం గౌడ్. మురళి గౌడ్. మాదాస్ నవీనగౌడ్. వడ్డేపల్లి చందు. కొత్తపల్లి బుజ్జి. కర్నాల సత్యనారాయణ. సందీప్ రెడ్డి. సర్వేశ్, గణేష్ దితరులు ఉన్నారు.