టీ హోర్డింగ్ ఎక్కి ఆత్మహత్యాయత్నం (వీడియో)

దిశ, సిద్దిపేట ప్రతినిధి: మద్యం మత్తులో ఓ యువకుడు ఆత్మహత్యకు ప్రయత్నించి హల్చల్ చేసిన సంఘటన సిద్దిపేట వన్ టౌన్ పోలీస్ స్టేషన్ పరిధిలోని ముస్తాబాద్ చౌరస్తా వద్ద చోటు చేసుకుంది. స్థానికులు తెలిపిన వివరాల ప్రకారం...చిన్న గుండవెల్లి గ్రామానికి చెందిన గద్దల కొమురయ్య అనే వ్యక్తి డ్రైవర్ గా పనిచేస్తూ కుటుంబాన్ని పోషించుకుంటున్నాడు. గత కొద్ది రోజులుగా కుటుంబ కలహాలతో మనస్తాపానికి గురై మద్యానికి బానిసయ్యాడు. ఈ క్రమంలో పట్టణంలోని ముస్తాబాద్ చౌరస్తా వద్ద గల టీ హోర్డింగ్ పైకి ఎక్కి మెడలో తాడు వేసుకుని దూకేందుకు ప్రయత్నించాడు. ఈ క్రమంలో కొద్దిసేపు టీహోర్డింగ్ ను పట్టుకుని కొయురయ్య వేళాడు. విషయం గమనించిన స్థానికులు పోలీసులకు సమాచారం అందించారు. స్థానికులు, పోలీసులు చాకచక్యంగా వ్యవహరించి కొమురయ్య వెళ్లాడుతున్న చోట స్కూల్ బస్సును నిలపడంతో గద్దల కొమురయ్య బస్సుపై దూకడంతో ప్రణాపాయం తప్పింది. స్థానికులు, పోలీసులు వెంటనే బస్సు ఎక్కి కొమురయ్య మెడకు ఉన్న తాడు తీసివేశారు. గద్దల కొమురయ్యను పోలీసులు అదుపులోకి తీసుకుని కౌన్సిలింగ్ ఇచ్చి విడిచిపెట్టారు. కాగా టీహోర్డింగ్ పై కెక్కి యువకుడు ఆత్మహత్యాయత్నం వీడియో వైరల్ కాగా స్థానికంగా కలకలం రేపింది.