కరెంట్ షాక్ తగిలి కూలి మృతి…మరొకరికి గాయాలు

దిశ, చేగుంట : కట్టే మిషన్ లో పనిచేస్తున్న వ్యక్తికి కరెంట్ షాక్ తగిలి మృతి చెందగా మరో వ్యక్తికి తీవ్ర గాయాలు అయిన సంఘటన చేగుంట మండల కేంద్రంలో శనివారం చోటుచేసుకుంది. చేగుంట ఎస్సై చైతన్య కుమార్ రెడ్డి తెలిపిన వివరాల ప్రకారం… మండల పరిధిలోని అనంతసాగర్ గ్రామానికి చెందిన మెండే నర్సింలు (41) చేగుంట మండల కేంద్రంలోని శ్రీ వెంకటేశ్వర స్వామి కట్టే మిషన్ లో దినసరి కూలిగా పని చేస్తాడు. శనివారం ఉదయం కూలీ పని చేయడం కోసం వచ్చిన నర్సింలు, సామిల్ యజమాని గర్దాస్ రామారావు తో కలిసి రంపం దారు పడుతుండగా ప్రమాదవశాత్తు మిషన్ కు కరెంటు సరఫరా కాగా షాక్ తగిలింది. రంపము దారు పడుతున్న నరసింహులు, రామారావులకు తీవ్ర గాయాలు కాగా ఆసుపత్రికి తరలించే లోపు నరసింహులు మృతి చెందాడు. తీవ్రంగా గాయపడ్డ రామారావు చికిత్స నిమిత్తం ఆస్పత్రికి తరలించారు. కరెంట్ షాక్ తో మృతి చెందిన నర్సింలు మృతదేహాన్ని తూప్రాన్ ఏరియా ఆసుపత్రికి తరలించారు. మృతుడు నరసింహులు భార్య యాదమ్మ ఫిర్యాదు మేరకు కేసు నమోదు చేసుకొని దర్యాప్తు చేసినట్లు ఎస్సై తెలిపారు.