రైతుల సమస్యలు గ్రీవెన్స్ పోర్టల్ ద్వారా పరిష్కారం

దిశ, కొత్తగూడెం : రైతు రుణమాఫీలో భాగంగా మూడు విడతల్లో 57,983 మంది రైతులకు 415 కోట్ల 34 లక్షల 84 వేల 332 రూపాయలు రైతుల ఖాతాలో జమ చేసినట్టు జిల్లా కలెక్టర్ జితేష్ వి పాటిల్ తెలిపారు. ప్రభుత్వ మార్గదర్శకాల ప్రకారం అర్హత కలిగిన ప్రతి రైతుకు రుణమాఫీ జరుగుతుందని అన్నారు. మొదటివిడత రుణమాఫీలో 28,801 మంది రైతులకు 136 కోట్ల 64 లక్షల 86 వేల 132 రూపాయలు, రెండో విడతలో 17309 మంది రైతులకు 147 కోట్ల 33 లక్షల 79 వేల 632 రూపాయలు, మూడో విడతలో 11873 రైతులకు 131 కోట్ల 36 లక్షల 18 వేల 568 రూపాయలు రుణమాఫీ నగదు రైతుల ఖాతాలో జమ చేశామని తెలిపారు. వ్యవసాయం, సహకార శాఖ రుణ మాఫీ 2024 ఫిర్యాదుల నమోదు, పరిష్కారానికి మార్గదర్శకాలు, సూచనలను కలెక్టర్ ప్రకటించారు.

     మండల వ్యవసాయ అధికారి తప్పనిసరిగా సీఎల్​డబ్ల్యు పోర్టల్ (www.clw.telangana.gov.in)లో రైతు సమాచార పత్రాన్ని యాక్సెస్ చేయాలని, రైతు సమాచార పత్రం కాపీని రైతుతో పంచుకోవాలని తెలిపారు. ఆధార్ తప్పుగా ఉన్న సందర్భాల్లో మండల వ్యవసాయ అధికారులు తప్పనిసరిగా రైతు నుండి ఆధార్ కార్డు కాపీని పొందాల్సి ఉంటుందని , పోర్టల్‌లో సరైన ఆధార్‌ అప్‌లోడ్ చేయాలని తెలిపారు. ఓటరు కార్డు, వాహన లైసెన్స్, రైతు రేషన్ కార్డు వంటి ప్రత్యామ్నాయ గుర్తింపు పత్రాన్ని సేకరించి అప్‌లోడ్ చేయాలన్నారు . కుటుంబాలు ఇంకా నిర్ణయించబడని సందర్భాల్లో మండల వ్యవసాయ అధికారులు తప్పనిసరిగా రైతు ఇంటిని సందర్శించి, రైతు వెల్లడించిన ఆధార్ కాపీలు, కుటుంబ సభ్యుల సంఖ్యను తప్పనిసరిగా సంగ్రహించాలన్నారు.

    కుటుంబ వివరాలను మండల వ్యవసాయ అధికారుల ద్వారా తప్పనిసరిగా పోర్టల్‌లో అప్‌డేట్ చేయాలన్నారు. రైతుకు రైతు పాస్‌బుక్ లేని సందర్భాల్లో, రైతు నుండి పొందిన తర్వాత దానిని పోర్టల్‌లో అప్‌లోడ్ చేయవచ్చని అన్నారు. ఆధార్‌లో పేరు, లోన్ ఖాతాలో పేరు మధ్య లోపాలు లేదా అసమతుల్యత ఉన్న సందర్భాల్లో రుణం తీసుకున్న వ్యక్తి గుర్తింపును ఏర్పాటు చేయాలని, రుణం తీసుకున్న వ్యక్తి సరైన ఆధార్ నంబర్‌ను పోర్టల్‌లో అప్‌లోడ్ చేయాలని సూచించారు. అసలు, వడ్డీ మొత్తంలో సరిపోని పక్షంలో రైతు నుండి ఒక దరఖాస్తును తీసుకుని వివరాలను క్లుప్తంగా పేర్కొంటూ పోర్టల్‌లో అప్‌లోడ్ చేయవచ్చని, నిర్ధారణ లేదా దిద్దుబాటు కోసం అదే సంబంధిత బ్యాంకుకు పంపబడుతుందని సూచించారు.పై కార్యకలాపాలలో పోర్టల్‌లో నవీకరణ ఉంటుంది కాబట్టి, పోర్టల్ త్వరలో నవీకరించబడిన తర్వాత ప్రస్తుత ప్రాతినిధ్యాలు, పత్రాలను సేకరించి అప్‌లోడ్ చేయవచ్చని సూచించారు.