దిశ, వీణవంక: మినీ మేడారంగా పేరుగాంచిన వీణవంక సమ్మక్క-సారలమ్మ జాతరకు ఇటీవలే ఎండోమెంట్ ఆధ్వర్యంలో కమిటీలు వేశారు. ఈ కమిటీపై అభ్యంతరం వ్యక్తం చేస్తూ పాడి రామకృష్ణారెడ్డి హైకోర్టును ఆశ్రయించగా, కలెక్టర్ ఆధ్వర్యంలో ఎండోమెంట్ ద్వారా ఏర్పరచిన కమిటీని వ్యతిరేకిస్తూ హైకోర్టు తీర్పునిచ్చింది. హైకోర్టు ఇచ్చిన తీర్పుకు వ్యతిరేకంగా రద్దయిన కమిటీ సభ్యులు పనులు నిర్వహిస్తున్నారని, హైకోర్టు తీర్పును స్థానిక పోలీసులు అమలు చేయాలని రామకృష్ణారెడ్డి వర్గీయులు రోడ్డుపై బైఠాయించి గురువారం నిరసన తెలిపారు. ఈ సందర్భంగా పాడి రామకృష్ణారెడ్డి మాట్లాడుతూ... మండల ప్రజల కోరిక మేరకు గత 40 ఏళ్లుగా తమ సొంత వ్యవసాయ భూముల్లో సమ్మక్క-సారలమ్మ జాతర నిర్వహిస్తున్నామని, కానీ, ఇటీవల ప్రభుత్వం 22 మందితో కమిటీ ఏర్పరిచిందని, ఈ కమిటీని వ్యతిరేకిస్తూ హైకోర్టుకు వెళ్లగా కమిటీ చెల్లదని కోర్టు తీర్పు ఇచ్చిందని తెలిపారు. పోలీసులు, అధికారులు హైకోర్టు ఉత్తర్వులను అమలు చేయాలని, జాతరను ప్రశాంతమైన వాతావరణంలో జరిగేలా చూడాలని కోరారు.