నిషేధిత చైనా మాంజా పై స్పెషల్ డ్రైవ్...

దిశ, సిటీక్రైం : మనుషులకు , జంతువులకు, పశువులకు ప్రాణహాని కలిగించే చైనా మాంజా పై హైదరాబాద్ పోలీసులు సీరియస్ గా ఉన్నారు. ఈ నేపథ్యంలో మంగళహాట్ పోలీస్ స్టేషన్ ఇన్స్పెక్టర్ మహేష్, సబ్ ఇన్స్ పెక్టర్ లు గత రెండు నెలలుగా ప్రత్యేక డ్రైవ్ ను నిర్వహిస్తున్నారు. ఈ ప్రాంతంలో అధికంగా పతంగులు, మాంజాలు తయారు చేసే వృత్తిలో ఉన్న వారితో పాటు ఇక్కడ విక్రయాలు జరుపుతున్న దుకాణాల వారితో, అక్కడికి వచ్చే కొనుగోలుదారులతో మాట్లాడి నిషేధిత చైనా మాంజాను ఉపయోగించవద్దని తెలిపారు. ఈ స్పెషల్ డ్రైవ్ లో మొత్తం 18 మంది కేసులను నమోదు చేసినట్లు పోలీసులు తెలిపారు. నిషేధిత చైనా మాంజాను విక్రయించడం చట్టరీత్యా నేరమని సౌత్ వెస్ట్ జోన్ డీసీపీ చంద్రమోహన్, అదనపు డీసీపీ అష్వాక్ ,ఏసీపీ వెంకటరెడ్డిలు తెలిపారు.