గురునానక్ బోధనలు సదా అనుసరణీయం.. సీఎం రేవంత్ రెడ్డి

దిశ, తెలంగాణ బ్యూరో: వినయం, సేవాభావంతో జీవితాన్ని గడపాలని చెప్పిన గురునానక్ సందేశం సదా అనుసరణీయమని సీఎం రేవంత్ రెడ్డి అన్నారు. సిక్కు మ‌త స్థాప‌కులు గురునానక్ జయంతిని పురస్కరించుకుని రాష్ట్ర ప్రజలకు, సిక్కు సోద‌రుల‌కు సీఎం శుభాకాంక్షలు తెలిపారు. గురునానక్ ప్రవచించిన ప్రేమ, కరుణ, మానవతా సందేశాలు అందరినీ సరైన మార్గంలో నడిపిస్తాయని ఆయన ఆకాంక్షించారు. శ్రమ గౌరవాన్ని, సంపాదించిన దానిని ఇతరులతో పంచుకోవాలని గురునానక్ బోధించారని సీఎం గుర్తు చేశారు. ప్రజలు సోదరభావం, సామరస్యం, ఆత్మగౌరవంతో జీవించాలనే చింతనను ప్రపంచానికి చాటి చెప్పారని సీఎం కొనియాడారు. గురునానక్ జీవితం, ఆయన బోధనలు మానవాళికి నిరంతరం ప్రేరణ కలిగిస్తాయని సీఎం రేవంత్‌రెడ్డి తెలిపారు.