ఇది సాగునీరు కాదు.. తాగునీరు

దిశ, ఖానాపూర్ : వేసవికాలం మొదలు కావడంతోనే గ్రామాల్లో తాగునీటి కష్టాలు నెలకొంటున్నాయి. ప్రతి గ్రామంలోని ప్రజలకు తాగునీటి సమస్యలు లేకుండా చూసేందుకు మిషన్ భగీరథ నీటిని అందిస్తున్నారు. కానీ ఆ మిషన్ భగీరథ తాగునీరు రోడ్లపై వృథాగా పోతున్నా అధికారులు మాత్రం పట్టించుకోవడం లేదు. నిర్మల్ జిల్లా ఖానాపూర్ మండలంలోని మస్కపూర్ గ్రామపంచాయతీ పరిధిలోని మెటపల్లి వెళ్లే రోడ్డు పక్కన ఉన్న మిషన్ భగీరథ తాగు నీటి మెయిన్ వాల్వ్​ నుంచి నీరు పెద్ద మొత్తంలో వృథాగా పోతుంది. సుమారు 3 నుంచి 5 హెచ్​పీల మోటారు నీరు పోతుండటం చూసి ప్రజలు ఆగ్రహం వ్యక్తం చేస్తున్నారు. అధికారులు ఇప్పటికైనా స్పందించి నీటి వృథాను అరికట్టాలని కోరుతున్నారు.