జీవితంపై విరక్తి కలిగి యువకుడి బలవన్మరణం

దిశ, లక్షెట్టిపేట: వ్యవసాయ బావిలో మృతదేహం లభ్యమైన ఘటన మునిసిపాలిటీ పరిధిలోని అంకతివాడ కాలనీలో శనివారం చోటుచేసుకుంది. వివరాల్లోకి వెళితే.. గాంధీనగర్ కాలనీ కి చెందిన రాచర్ల అజయ్ కుమార్(40) ఈనెల 13న రాత్రి 8 గంటల ప్రాంతంలో సెకండ్ షో సినిమా చూసేందుకు వెళ్తున్నానని చెప్పి ఇంట్లో నుంచి బయలుదేరాడు. మరుసటి రోజు అతను ఇంటికి రాకపోవడంతో కుటుంబ సభ్యులు రెండు రోజులుగా బంధువులు, తెలిసిన వారింట్లో వెతికినా ఆచూకీ దొరకలేదు.

వ్యవసాయ బావిలో మృతదేహం ఉందని సమాచారం అందడంతో పోలీసులు బావి వద్దకు వెళ్లి చూడగా ఆ మృతదేహం అజయ్ కుమార్ దిగా గుర్తించారు. కాగా, మృతుడికి ఇంకా పెళ్లి కాలేదు. ఈ క్రమంలో మద్యానికి బానిసై జీవితంపై విరక్తి చెంది బావిలో దూకి ఆత్మహత్యకు పాల్పడినట్లు భావిస్తున్నారు. ఈ మేరకు కేసు నమోదు చేసుకొని దర్యాప్తు చేస్తున్నట్లు ఎస్సై లక్ష్మణ్ తెలిపారు.