Bumrah : ఐసీసీ టెస్ట్ క్రికెటర్ ఆఫ్ ది ఇయర్ అవార్డుకు బుమ్రా నామినేట్

దిశ, స్పోర్ట్స్ : భారత ఫాస్ట్ బౌలర్ బుమ్రా(Jasprit Bumrah) ఐసీసీ టెస్ట్ క్రికెటర్ ఆఫ్ ది ఇయర్ అవార్డు(ICC Test Cricketer Of The Year)కు సోమవారం నామినేట్ అయ్యాడు. ఈ మేరకు ఐసీసీ తన వెబ్‌సైట్‌లో వివరాలను వెల్లడించింది. ‘గతేడాది గాయం నుంచి కోలుకుని బుమ్రా 2024లో అత్యుత్తమ ప్రదర్శన కనబర్చాడు. ఈ ఏడాదిలో అత్యధిక వికెట్లు తీశాడు. సౌతాఫ్రికా, ఆస్ట్రేలియాతో పాటు స్వదేశంలో రాణించాడు. ఈ ఏడాది మొత్తం వరుసగా వికెట్లు తీశాడు. ఆస్ట్రేలియాతో జరుగుతున్న తాజా సిరీస్‌లో చెలరేగి బౌలింగ్ చేస్తున్నాడు.’ అని ఐసీసీ తెలిపింది. పెర్త్ టెస్ట్‌లో అద్భుతమైన స్పెల్ వేసి బుమ్రా భారత్‌కు 295 పరుగుల భారీ విజయాన్ని అందించాడని ఐసీసీ గుర్తు చేసింది.

ఈ ఏడాది టెస్ట్ క్రికెట్‌లో ప్రతిభ కనబరిచి బుమ్రా అత్యుత్తమ బౌలర్‌గా కొనసాగుతున్నాడు. 2024లో మొత్తం 13 టెస్ట్‌ల్లో 14.92 యావరేజ్‌తో 71 వికెట్లను బుమ్రా పడగొట్టాడు. ప్రస్తుతం జరుగుతున్న బోర్డర్-గవాస్కర్ ట్రోఫీలో సైతం నాలుగు టెస్ట్‌ల్లో 30 వికెట్లు పడగొట్టి టాప్ బౌలర్‌గా నిలిచాడు. బుమ్రాతో పాటు ఇంగ్లాండ్ క్రికెటర్లు జో రూట్, హ్యారీ బ్రూక్, శ్రీలంకకు చెందిన కమిందు మెండిస్ ఈ అవార్డుకు నామినేట్ అయినట్లు ఐసీసీ ప్రకటించింది.