ఆన్‌లైన్ పాఠాల్లో అందాల ‘రాశి’

ఊహలు గుసగుసలాడే సినిమాతో తెలుగు తెరకు పరిచయమైన రాశీఖన్నా ఇటు టాలీవుడ్, అటు కోలీవుడ్‌లోనూ క్రేజీ చాన్స్‌లతో దూసుకుపోతోంది. కెరీర్ స్టార్టింగ్‌లో బొద్దుగా ఉన్న రాశికి అంతగా అవకాశాలు రాలేదనే చెప్పాలి. ప్రస్తుతం వరుస హిట్లతో ఫుల్‌ఫామ్‌లో ఉన్న రాశి.. ఈ ఏడాది ఆరంభంలో వరల్డ్ ఫేమస్ లవర్‌తో ప్రేక్షకులను పలకరించింది. ఆ సినిమా ఫలితం నిరాశపరిచినా తన నటనకు మాత్రం మంచి మార్కులే పడ్డాయి. ఇలా వెండితెరపై బెల్లం శ్రీదేవి, ఏంజెల్ ఆర్ణ లాంటి పాత్రలతో ప్రేక్షకుల మన్ననలు పొందిన ఈ భామ.. ఇప్పుడు మళ్లీ క్లాస్‌లకు వెళ్తోందట. అదేంటి అనుకుంటున్నారా?

విషయం ఏంటంటే.. ఢిల్లీకి చెందిన రాశి హిందీలో ‘మద్రాస్ కేఫ్’ సినిమాతో ఫిల్మ్ కెరియర్‌ను ప్రారంభించింది. ఎంట్రీ బాలీవుడ్ సినిమాతో జరిగినా.. తెలుగులోనే మంచి గుర్తింపు పొందింది. తను తెలుగులో చక్కగా మాట్లాడగలదు కూడా. ప్రస్తుతం తమిళ్‌లోనూ క్రేజీ ప్రాజెక్ట్స్ దక్కించుకుంటున్న ఈ భామ.. స్టార్ ఇమేజ్ పొందేందుకు భాష అడ్డుకాకుడదని తమిళ పాఠాలు నేర్చుకుంటోందట. తమిళ్ భాషపై పట్టు సాధించేందుకు ఈ లాక్‌డౌన్ పీరియడ్‌లో శ్రీమతి లీలా మేడం దగ్గర ఆన్‌లైన్ క్లాస్‌లు వింటోందట. ఇప్పుడు తనకు క్లాస్ వర్క్, హోమ్ వర్క్, క్లాస్ టెస్ట్‌లు కూడా ఉన్నాయట. అంతేనా ‘ఈ లాక్‌డౌన్ సమయంలో నేను ఈ పని చేస్తున్నా.. మరి మీరు ఎలాంటి సృజనాత్మక పనులు చేస్తున్నారో చెప్పండి’ అంటోంది రాశి. ఒకవేళ ఇంకా స్టార్ట్ చేయకపోతే ఇప్పుడే ఓ సరికొత్త పని ప్రారంభించండి అని సూచిస్తోంది.