నేరేళ్లలో మంత్రి కేటీఆర్‌కు ఊహించని‌ షాక్(వీడియో)

దిశ, సిరిసిల్ల: మంత్రి కేటీఆర్ సిరిసిల్ల పర్యటనకు వచ్చినప్పుడల్లా నేరెళ్ల బాధితుల నుంచి ఆయనకు నిరసన సెగ తప్పడం లేదు. ఐదేళ్ల కిందట జరిగిన నేరేళ్ల ఘటన రాష్ట్రంలో సంచలనం సృష్టించిన విషయం తెలిసిందే. ఆ సంఘటన తర్వాత నుంచి కేటీఆర్ సిరిసిల్ల పర్యటనకు వచ్చినప్పుడల్లా నేరెళ్ల బాధితులు తమకు న్యాయం చేయాలంటూ ఏదో రకంగా నిరసన తెలుపుతూనే ఉన్నారు. మంత్రి పర్యటనకు ముందస్తుగా పోలీసులు నేరేళ్ల బాధితుల ఇంటి ముందు గస్తీ కాయడం పరిపాటిగా మారింది. తాజాగా మంత్రి కేటీఆర్ శనివారం సిరిసిల్ల జిల్లాలో పర్యటిస్తున్నారు. కాగా మంత్రి కాన్వాయ్ నేరేళ్ల వద్దకు రాగానే నేరేళ్ల బాధితుడు కోల హరీష్.. కాన్వాయ్‌ని అడ్డుకునే ప్రయత్నం చేయగా పోలీసులు అతడిని నిలువరించారు. తమను ఆదుకుంటామని హామీ ఇచ్చిన మంత్రి ఇప్పటి వరకూ ఎలాంటి న్యాయం చేయకపోగా, తమపై థర్డ్ డిగ్రీ ప్రయోగించిన పోలీసులపై ఎలాంటి చర్యలు తీసుకోలేదని ఆగ్రహం వ్యక్తం చేశాడు. కేటీఆర్‌ డౌన్ డౌన్… అంటూ నినాదాలు చేశారు. తమపై థర్డ్ డిగ్రీ ప్రయోగించిన పోలీసులపై చర్యలు తీసుకొని, మంత్రి హామీ నిలబెట్టుకోవాలని డిమాండ్ చేశారు.