రాజకీయాల్లోకి కంగనా! పోటీ చేసే స్థానం ఇదే..?

దిశ, డైనమిక్ బ్యూరో: పొలిటికల్ ఎంట్రీపై బాలీవుడ్ నటి కంగనా రనౌత్ మరోసారి ఆసక్తికర వ్యాఖ్యలు చేశారు. చెన్నైలో జరిగిన చంద్రముఖి -2 మూవీ ప్రమోషన్ కార్యక్రమంలో పాల్గొన్న ఆమె పొలిటికల్ ఎంట్రీపై స్పష్టతనిచ్చారు. రాజకీయాల్లో అవకాశం వస్తే వదులుకోబోనని చెప్పారు. తాను దేశభక్తురాలినని, అందుకే తనవంతుగా పేదలకు తోచిన సాయం చేస్తానని చెప్పుకొచ్చారు. అయితే.. చాలాకాలంగా ప్రధాని నరేంద్ర మోడీ, బీజేపీకి బహిరంగంగా మద్దతు ప్రకటిస్తున్న ఆమె.. ప్రత్యక్ష రాజకీయాల్లోకి వచ్చి బీజేపీ తరపున పోటీ చేస్తారనే వార్తలు వినిపిస్తున్నాయి. రాబోయే లోక్‌సభ ఎన్నికల్లో బీజేపీ అభ్యర్థిగా తన రాజకీయ అదృష్టాన్ని పరీక్షించుకోబోతున్నారనే చర్చ సైతం నడుస్తోంది.

అక్కడి నుంచే పోటీ?

రాబోయే లోక్‌సభ ఎన్నికలు బీజేపీకి చాలెంజ్‌గా మారాయి. ఇండియా కూటమి బలపడుతున్న నేపథ్యంలో గెలుపు గుర్రాలకే టికెట్లు కేటాయించేందుకు కసరత్తు మొదలు పెట్టింది. ఈ క్రమంలో వివిధ రంగాలకు చెందిన సెలబ్రిటీలను బరిలోకి దింపాలని భావిస్తోంది. ఈ క్రమంలోనే కంగనా రనౌత్‌ హిమాచల్‌ప్రదేశ్‌లోని మండి లోక్‌సభ స్థానం నుంచి పోటీ చేస్తారనే టాక్ వినిపిస్తోంది.