యార్కర్‌లో మలింగ‌దే మార్క్: బుమ్రా

దిశ, స్పోర్ట్స్: అంతర్జాతీయ క్రికెట్‌లో అత్యుత్తమ యార్కర్లు సంధించే బౌలర్ మలింగ మాత్రమేనని టీం ఇండియా పేసర్ బుమ్రా అన్నాడు. స్వతహాగా బూమ్రా అద్భుతమైన యార్కర్లు వేస్తుంటాడు. కానీ, తనకంటే అత్యుత్తమ యార్కర్లు వేసేది మలింగానే అని కితాబిచ్చాడు. ఇండియన్ ప్రీమియర్ లీగ్ (ఐపీఎల్)లో వీరిద్దరూ ప్రస్తుతం ముంబై ఇండియన్స్ జట్టుకు ప్రాతినిథ్యం వహిస్తున్నారు. తాజాగా ఐసీసీకి బూమ్రా ఒక ఇంటర్వ్యూ ఇచ్చాడు. ‘నేనైతే ఒక ఓవర్లో ఒకటి రెండు యార్కర్లను వేయగలను. కానీ, మలింగలో మాత్రం ఓవర్ మొత్తం యార్కర్లు వేయగల ప్రతిభ ఉంది. నా బౌలింగ్ మెరుగుపడటానికి మలింగనే కారణం’అని బుమ్రా చెప్పాడు. ఇక ఐసీసీ పెట్టిన కొత్త నిబంధనను అతను వ్యతిరేకించాడు. బంతి స్వింగ్ కావడానికే ఉమ్మి లేదా చెమటను రుద్దుతాం. బంతిని స్వింగ్ చేయడానికే కదా బౌలర్ ఉన్నది. మరి మెరుపు లేనిది స్వింగ్ ఎలా వస్తుందని ప్రశ్నిస్తున్నాడు. ఐసీసీ ఉమ్మి వాడొద్దని నిబంధన పెట్టడాన్ని తాను వ్యతిరేకిస్తున్నట్లు చెప్పాడు. ఇక, కరోనా లాక్‌డౌన్ కారణంగా చాలా రోజులు ఇంటికే పరిమితమయ్యాను. ఇప్పుడు మైదానంలోనికి అడుగు పెడితే శరీరం ఎలా స్పందిస్తుందో తెలియడం లేదు. తాను బౌలింగ్ చేసి చాలా రోజులైందని బుమ్రా చెప్పాడు.