టీఆర్‌ఎస్ నేతలకు రోషం, పౌరుషం ఉంటే ఆయనను కారు గుర్తుపై గెలిపించుకోవాలి..

దిశ, ఖమ్మం రూరల్: పాలేరు నియోజకవర్గంలో కాంగ్రెస్ జెండా మోయని కందాల ఉపేందర్ రెడ్డిని కాంగ్రెస్ పార్టీ కార్యకర్తలు కష్టపడి గెలిపించారని రూరల్ మండల కాంగ్రెస్ పార్టీ అధ్యక్షులు కళ్ళెం వెంకటరెడ్డి అన్నారు. ఆయన గెలిచింది కాంగ్రెస్ పార్టీ నుంచే అందుకే ఆయనను విమర్శించే హక్కు కాంగ్రెస్‌కే ఉందన్నారు. ఆదివారం మండలంలోని టీఎన్జీవోస్ కాలనీలో విలేకరుల సమావేశాన్ని నిర్వహించారు. ఈ సందర్భంగా వెంకటరెడ్డి మాట్లాడుతూ.. కాంగ్రెస్ పార్టీకి కందాల చేసిన ద్రోహానికి విమర్శిస్తూనే ఉంటామని తెలిపారు. కాంగ్రెస్ నాయకులను, కార్యకర్తలను గ్రామాల్లో తిరగనివ్వమని మాట్లాడుతున్నారూ మీరేమైనా వీధి రౌడీలా అని ప్రశ్నించారు.

టీఆర్‌ఎస్ నేతలకు రోషం, పౌరుషం ఉంటే కాంగ్రెస్ పార్టీ గుర్తు మీద గెలిచిన కందాళను తక్షణమే ఎమ్మెల్యే పదవికి రాజీనామా చేయించి కారు గుర్తు మీద గెలిపించుకోవాలని సవాల్ విసిరారు.
మీ స్వార్ధ రాజకీయాల కోసం చేస్తున్న చిల్లర రాజకీయాలను పాలేరు ప్రజలు ఛీ కొడుతున్నారని ఘాటుగా స్పందించారు. గతంలో మీరు చేసిన చిల్లర చేష్టలతోనే పాలేరు‌లో ఓడిపోయారని కందాళను విమర్శించారు. మరోసారి పాలేరు గడ్డ మీద కాంగ్రెస్ మువ్వన్నెల జెండా ఎగరేయడానికి పాలేరు ప్రజలు కాంగ్రెస్ తో కలిసి సిద్ధంగా ఉన్నారన్నారు. శాసనసభా పక్ష నాయకులు భట్టి విక్రమార్క గారిని విమర్శించే నైతిక విలువలు మీకు లేవన్నారు. భట్టిగారు పిల్లిలా పారిపోలేదని పేర్కొన్నారు.

ఆయన రాకముందు గారడీ చేసి భట్టీ గారు కూసుమంచి సెంటర్‌కు చేరుకునే సమయానికి పారిపోయారని ఎద్దేవా చేశారు. ఈ సమావేశంలో జిల్లా కాంగ్రెస్ నాయకులు రాయల నాగేశ్వరరావు, కాంగ్రెస్ సీనియర్ నాయకులు కన్నేటి వెంకటేశ్వర్లు, తనగంపాడు సర్పంచ్ కేతినేని వేణు, మంకెన వాసు, మద్ది వీరారెడ్డి, బానోత్ పాప్యా నాయక్, పోటు లెనిన్, ఆరెంపుల రామయ్య కాంగ్రెస్ నాయకులు, కార్యకర్తలు, తదితరులు పాల్గొన్నారు.