మహేష్ బాబు ప్రమోట్ చేసిన కంపెనీ భారీ మోసం.. కోట్ల చీటింగ్‌పై పోలీసుల ఫోకస్
స్టార్స్‌గా గుర్తింపు తెచ్చుకున్న కొంత మంది హీరోలు యాడ్స్ సైతం చేస్తుంటారు.
దిశ, వెబ్‌డెస్క్: స్టార్స్‌గా గుర్తింపు తెచ్చుకున్న కొంత మంది హీరోలు యాడ్స్ సైతం చేస్తుంటారు. కూల్ డ్రింక్, రియల్ ఎస్టేట్ సంస్థల్లో పెట్టుబడులు, గోల్డ్ లోన్స్ ఇలాంటి వాటిని ప్రమోట్ చేస్తుంటారు. అయితే.. హీరో చెప్పాడంటే నిజంగా మంచి సంస్థలే అయుంటాయని చాలా మంది నమ్మి పెట్టుబడులు పెడుతుంటారు. ఇలా పెట్టుబడులు పెట్టి కొన్ని సార్లు దారుణంగా మోసపోతుంటారు. ఇదే కోవలో సూపర్ స్టార్ మహేష్ బాబు ప్రమోట్ చేసిన ఓ రియల్ ఎస్టేట్ సంస్థపై ఇప్పుడు చీటింగ్ కేసు నమోదైంది. దానికి సంబంధించిన పూర్తి వివరాల్లోకి వెళితే..
హైదరాబాద్ వెంగళరావు నగర్ కేంద్రంగా సాయి సూర్య డెవలపర్స్ అనే రియల్ ఎస్టేట్ కంపెనీ బిజినెస్ చేస్తోంది. దీనికి సూపర్ స్టార్ మహేష్ బాబు గతంలో ప్రమోట్ చేశారు. 2021 ఏప్రిల్‌లో షాద్ నగర్‌లోని 14 ఎకరాల భూమి కోసం నక్క విష్ణువర్ధన్, డాక్టర్ సుధాకర్ రావు, శ్రీకాకుళం విఠల్ మహేష్, రాజేష్ లాంటి వారు పెట్టుబడులు పెట్టారు. వ్యవసాయేతర భూమి విషయంలో కంపెనీతో వీరు ఒప్పందం కుదుర్చుకున్నారు. హైదరాబాద్ మెట్రోపాలిటన్ డెవలప్మెంట్ అథారిటీ నుంచి త్వరలోనే అనుమతులు తీసుకుని.. ఆ తర్వాత ఫ్లాట్‌ల రిజిస్టర్ పనులు పూర్తి చేస్తామని చెప్పిన సాయి సూర్య డెవలపర్స్ కంపెనీ ఏళ్లు గడుస్తున్నా దానిపై ఎలాంటి సమాచారం ఇవ్వలేదు.
దీంతో విష్ణువర్ధన్, అతని స్నేహితులకు అనుమానం వచ్చి సంస్థ ప్రతినిధులను ప్రశ్నించారు. వారి నుంచి సరైన సమాధానం రాకపోవడంతో అనుమానం వచ్చి.. రిజిస్టర్, స్టాంప్ డిపార్ట్ మెంట్‌లో ఎంక్వైరీ చేశారు. అక్కడ వాళ్లకు ఓ షాకింగ్ విషయం తెలిసింది. వారు పెట్టుబడి పెట్టిన భూమి ఇప్పటికే ఎస్వీఆర్, టీవీఆర్, వెంకటేష్ అనే ఫైనాన్షియర్ల కంపెనీల పేరు మీదకి రిజిస్టర్ అయి ఉందని తేలింది. ఇక ఏం చెయ్యాలో తెలియని స్థితిలో పోలీసులను ఆశ్రయించారు. సాయి సూర్య డెవలపర్స్‌కి ఉన్న ఇమేజ్, మహేష్ బాబు లాంటి స్టార్స్ ప్రమోట్ చేయడంతో ఇన్ని రోజులు సైలెంట్‌గా ఉన్నామని.. కానీ ఇంత మోసం జరుగుతుందని అనుకోలేదని విష్ణువర్ధన్, అతని స్నేహితులు వాపోయారు. దీనిపై సెక్షన్ 406, 420 కింద ఆర్థిక అవకతవకలు, మోసానికి పాల్పడినట్లు కేసు నమోదు చేసిన పోలీసులు విచారణ చేపట్టారు. కాగా.. రూ. 3 కోట్ల 21 లక్షల చీటింగ్ వ్యవహారంలో ఈ కంపెనీ ఓనర్ కంచర్ల సతీష్ చంద్రగుప్త పై చీటింగ్ కేసు నమోదైంది.
Read More: అభిమానులకు గుడ్ న్యూస్ చెప్పిన మడోన్నా.. పోస్ట్ వైరల్