Jhansi hospital horror: నర్సు అగ్గిపుల్ల వెలిగించడం వల్లే ప్రమాదం..!

దిశ, నేషనల్ బ్యూరో: ఉత్తరప్రదేశ్‌(Uttar Pradesh) ఝాన్సీలోని మహారాణి లక్ష్మీబాయ్‌ మెడికల్ కాలేజ్ లో(Jhansi hospital fire) జరిగిన అగ్నిప్రమాద ఘటనపై అధికారులు దర్యాప్తు చేస్తున్నారు. ఈ ఘోర ప్రమాదం జరగడానికి కారణం ఏంటన్నది తేల్చే పనిలో పడ్డారు. శనివారం సాయంత్రంకల్లా నివేదికను ప్రభుత్వానికి సమర్పించే అవకాశాలు ఉన్నాయి. అయితే.. ఘటనకు షార్ట్‌ సర్క్యూట్‌ కారణమని ప్రాథమికంగా అధికారులు అంచనా వేస్తున్నారు. అయితే, ఈలోగానే ప్రమాదానికి సంబంధించిన విస్తుపోయే విషయం ఒకటి బయటకు వచ్చింది. ఆక్సిజన్‌ సిలిండర్‌ పైప్‌ను కనెక్ట్‌ చేస్తున్న సమయంలో ఓ నర్సు నిర్లక్ష్యంగా అగ్గిపుల్ల వెలిగించినట్లు తెలిపిన ఓ ప్రత్యక్ష సాక్షి చెబుతున్నారు. అయితే అధికారులు మాత్రం దర్యాప్తు తర్వాతే కారణంపై ప్రకటన చేస్తామని అంటున్నారు.

ప్రత్యక్షసాక్షి ఏమన్నాడంటే?

హమీర్‌పూర్‌కు(Hamirpur) చెందిన భగవాన్‌ దాస్‌ తన కొడుకును ఇదే ఆస్పత్రిలో చేర్చాడు. ప్రమాదం సంభవించినప్పుడు ఆయన అక్కడే ఉన్నాడు. ‘‘ఆ నర్సు అగ్గిపుల్ల వెలగించగానే.. ఒక్కసారిగా పెద్ద పేలుడు సంభవించింది. అక్కడంతా మంటలు అంటుకున్నాయి’’ అని దాస్‌ చెబుతున్నాడు. అయితే, ఘటనాస్థలి నుంచి తన కొడుకుతో పాటు మరికొందరు చిన్నారులను దాస్‌ రక్షించాడని పక్కన ఉన్నవాళ్లు చెబుతున్నారు. ప్రమాదం జరిగిన వెంటనే దాస్‌ ఓ గుడ్డలో నలుగురు పసికందుల్ని చుట్టి.. తన వీపుకి కట్టుకుని బయటకు తీసుకొచ్చాడని అక్కడే ఉన్న ఆస్పత్రి సిబ్బంది చెబుతున్నారు. అంతేకాకుండా స్థానికుల సాయంతో మరికొందర్ని కాపాడినట్లు తెలుస్తోంది. కాగా.. అగ్ని కీలలు ఎగసి పడ్డాక.. ఆస్పత్రిలోని సేఫ్టీ అలారంలు మోగకపోవడంతో చిన్నారుల తరలిపు ఆలస్యం అయ్యిందని తల్లిదండ్రులు ఆరోపిస్తున్నారు. అయితే.. ఈ ప్రమాదంపై దిగ్భ్రాంతి వ్యక్తం చేసిన డిప్యూటీ సీఎం బ్రజేష్‌ పాఠక్(Uttar Pradesh Deputy Chief Minister Brajesh Pathak).. బాధితులకు న్యాయం జరిగి తీరుతుందని చెబుతున్నారు. సిలిండర్‌ కాన్‌సెంట్రేటర్‌లో షార్ట్‌ సర్క్యూట్‌ వల్లే ప్రమాదం జరిగిందని అధికారులు చెబుతున్నారని అన్నారు. ఒకవేళ మానవ తప్పిదం జరిగి ఉంటే ఎవరినీ వదలబోమని.. బాధ్యులపై కఠిన చర్యలు ఉంటాయని అన్నారాయన. ఘటనపై మూడంచెల దర్యాప్తు కొనసాగుతుందని అన్నారు.