మహారాష్ట్రలో ఘోర రోడ్డు ప్రమాదం

దిశ, డైనమిక్ బ్యూరో: మహారాష్ట్రలోని రాయ్‌ఘడ్‌లో ఘోర రోడ్డు ప్రమాదం జరిగింది. గురువారం ఖోపోలి సమీపంలోని ముంబై-పుణే ఎక్స్‌ప్రెస్‌ హైవేపై ఒకటి కాదు రెండు కాదు వరుసగా 12 వాహనాలు ఒకదాని కొకటి ఢీ కొన్నాయి. అందులో ఏడెనిమిది కార్లు ఉండగా.. వాహనాలు పూర్తిగా ధ్వంసమయ్యాయి. ఈ ఘటనలో ఎటువంటి ప్రాణ నష్టం జరగలేదని, నలుగురికి మాత్రం గాయాలైనట్లు సమాచారం. జరిగిన ప్రమాదం కారణంగా ఎక్స్‌ప్రెస్‌వేపై చాలాసేపు ట్రాఫిక్‌ జామ్‌ ఏర్పడింది. ట్రక్కు బ్రేక్ ఫెయిల్ కావడంతో ఈ ప్రమాదం జరిగినట్లు ఓ అధికారి తెలిపారు. ఘటనాస్థలికి చేరుకున్న పోలీసు బృందాలు క్షతగాత్రులను ఆస్పత్రికి తరలించారు. దీంతో ముంబై వైపు వెళ్లే వాహనాల రాకపోకలకు కొంత సేపు అంతరాయం ఏర్పడిందని తెలిపారు. ప్రమాదానికి సంబంధించిన వీడియో కూడా వెలుగులోకి వచ్చింది. ప్రస్తుతం ఈ వీడియో సోషల్‌మీడియాలో వైరల్ అవుతోంది.