ట్రాక్టర్ బ్యాటరీల దొంగల ముఠా అరెస్ట్​

దిశ, గన్నేరువరం : కరీంనగర్ రూరల్ పరిధిలో పలు గ్రామాల్లో ట్రాక్టర్ బ్యాటరీలు, హైడ్రాలిక్ పట్టీలు ఇటీవల దొంగిలించిన దొంగల ముఠాను గన్నేరువరం పోలీసులు పట్టుకున్నారు. ఏసీపీ వెంకటరమణ గన్నేరువరం పోలీస్ స్టేషన్ లో మీడియా సమావేశం ఏర్పాటు చేసి వివరాలు వెల్లడించారు. సీఐ స్వామి, ఎస్ఐ తాండ్ర నరేష్, పోలీస్ సిబ్బందిని అభినందించారు. ఆయన తెలిపిన వివరాల ప్రకారం కరీంనగర్ పరిసర ప్రాంతాలకు చెందిన సత్తు ప్రవీణ్ తో పాటు మరో నలుగురు కలిసి కరీంనగర్​లో సెల్ఫ్ డ్రైవింగ్ కారు అద్దెకు తీసుకొని చుట్టుపక్కల ఊర్లలో తిరుగుతూ ఆరుబయట ఉన్న ట్రాక్టర్ల బ్యాటరీలను, పట్టీలను చోరీ చేసేవారు.

    ఈ నేపథ్యంలో బాధితులు గన్నేరువరం ఎస్ఐ తాండ్ర నరేష్ కు ఫిర్యాదు చేశారు. దాంతో ఆయన సీసీ కెమెరాల ఆధారంగా నేరస్తులు వాడిన కారును గుర్తించి అరెస్ట్​ చేశారు. నేరస్తులందరూ ఇంటర్మీడియట్ చదువుకునే విద్యార్థులు. చెడు అలవాట్లకు లోనై ఖర్చులకు డబ్బులు సరిపోక చోరీ చేసే వారు. వీరి నుంచి 39 ట్రాక్టర్ బ్యాటరీలు, 25 హైడ్రాలిక్ పట్టీలు స్వాధీనం చేసుకున్నారు. వీటి విలువ సుమారు ఐదు లక్షల 20 వేల వరకు ఉంటుందని పోలీసులు తెలిపారు.